जुनिम गहतराज निर्देशित फिल्म 'तान्डवम्' को टिजर सार्वजनिक भएको छ।
शुक्रबार सार्वजनिक भएको ५७ सकेन्ड लामो टिजरले फिल्मको कथाको बारेमा प्रकाश पार्न खोजेको छ। फिल्मका मुख्य कलाकार अंकित खड्काको संवादबाट सुरू हुने टिजर निर्देशक समेत रहेको अभिनेता जुनिमको 'भगवान पनि मै हुँ, राक्षस पनि मै हुँ' संवादसँगै अन्त्य गरिएको छ। जसले फिल्मप्रति दर्शकमाझ कौतुहल्ता पैदा गर्ने देखिन्छ। फिल्मको डार्क थिममा तयार पारिएको टिजरमा सबैजना प्रमुख पात्रलाई स्थान दिइएको छ।
फिल्ममा अंकित र जुनिमसँगै पुष्कर गुरुङ, प्रेम सुब्बा, सरिना मगर, अनोज पाण्डे, कमल कार्की र गोपाल कटुवालको अभिनय रहेको छ। फिल्मले एक नव विवाहित जोडी जो आफ्नो पहिलो सन्तानको स्वागतको तयारी गरिरहँदा उनीहरु जीवनमा घट्ने अकल्पनिय घटनाले निम्त्याउने उतारचढावको कथालाई पारिवारिक तथा एक्सन थ्रिलर जनरामा प्रस्तुत गरिएको छ।
सिंहदेवी प्रोडक्सनले भिजुयल आट्र्स स्टुडियोको सहकार्यमा निर्माण भएको फिल्मका निर्माता धनकुमारी गहतराज, सविना मगर र मनिष गौतम हुन्। हरि घले लामाले खिचेको फिल्ममा सम्राट बस्नेतको एक्सन निर्देशन, सुशान्त गौतमको संगीत र कोबिद बज्रको ब्याग्राउण्ड म्युजिक रहेको छ। फिल्मको कथा, पटकथा तथा संवाद अनिरुद्ध आत्रेय र हुसेनले लेखेका हुन्।
यो फिल्म महाशिवरात्रीको अवसर पारेर फागुन ९ गतेदेखि रिलिज हुनेछ।
