ब्लकबस्टर फिल्म 'पूर्ण बहादुरको सारंगी' फेम्ड निर्देशक सरोज पौडेल यतिबेला नयाँ फिल्म निर्देशनको तयारीमा छन्।
उनले निर्देशन गर्न लागेको फिल्म 'कोशेढुंगा' को निर्माण घोषणासँगै कलाकारको लाइनअपलाई लिएर चर्चा भइरहेको छ।
निर्देशक पौडेलका अनुसार फिल्मका मुख्य कलाकारको लाइनअप पूरा भएको छ। यो फिल्ममा सुरक्षा पन्त, आर्यन सिक्देल, नीति शाह र प्रवीण खतिवडा अनुबन्ध भइसकेका छन्।
केही साताअघि सार्वजनिक गरिएको थिम पोस्टरले 'कोशेढुंगा' मा महिला चरित्रले लिड गर्ने संकेत गरिएको थियो। फिल्मको विषयवस्तुबारे भने निर्देशक पौडेलले खुलाएका छैनन्।
'फिल्म कस्तो हुने, कथा के हो, त्यो हामी केही समयपछि जानकारी गराउनेछौँ,' निर्देशक पौडेलले भने, 'तर हामी यति भन्छौं, पूर्ण बहादुरको सारंगी जसरी दर्शकले मन पराउनुभयो त्यसैगरी मन जित्ने फिल्म बनाउने प्रयासमा छौं।'
नरदेवी फिल्मसको प्रस्तुति रहेको फिल्ममा प्रेविल कँडेल र हरि महतको लगानी रहनेछ भने दिनेश खड्का कार्यकारी निर्माता रहेका छन्। बाबु श्रेष्ठको डीओपी रहने फिल्म सुरेन्द्र पौडेलले सम्पादन गर्नेछन्। फिल्ममा संगीत रिदम कँडेल र आशिष अविरलको रहनेछ।
फागुन २ गतेदेखि छायांकन सुरू हुने फिल्म २०८२ मा रिलिज हुने निर्माण पक्षले जानकारी दिएको छ।
