फिल्म 'होस्टेल ३' को 'टिक टिक टिक' बोलको गीत सार्वजनिक गरिएको छ।
शुक्रबार बुढासुब्बा युट्युब च्यानलमार्फत फिल्मको गीत सार्वजनिक गरिएको हो। गीतमा अलमोडा राणा उप्रेतीको शब्द, संगीत र स्वर रहेको छ। यसमा अलमोडासँगै सन्तोष राणाले र्याप भोकल दिएका छन्। प्रविण सिंहले कोरियोग्राफी गरेको गीतमा अभिनेताहरू पारस बम (कुलब्वाई), रिहान गिरी, आशिष घिमिरे, पदम तामाङ तथा अभिनेत्रीहरू सिम्रन पन्त, हेना नगरकोटी, र समा पराजुली फिचर्ड छन्।
सशान कँडेलले निर्देशन गरेको फिल्मको स्क्रिप्ट माधव शर्माले लेखेका छन्। कथा निर्देशक कँडेलकै हो। यसमा क्याम्पस जीवनका संघर्ष, मित्रता र रमाइलो क्षणहरूको कथा रहेको छ। फिल्ममा उमर खान, सन्तोष बानियाँ, रोहन श्रेष्ठ, आशिष पुरूषलगायतका कलाकारहरूको पनि अभिनय रहेको छ।
फिल्म सम्मान इन्टरटेनमेन्टले आरोन कन फिल्म्ससँगको सहकार्यमा निर्माण गरेको हो। निर्माताहरू सुरेश कँडेल, कर्ण कार्की र गोविन्द अधिकारी तथा कार्यकारी निर्माता शंखर कोइराला हुन्। सह-निर्माताहरू शिशिर ज्ञवाली, कुन्दन गुप्ता र अनीश सिग्देल तथा लाइन प्रोड्युसर कोसिसराज क्षेत्री हुन्।
अर्जुन तिवारी डिओपी, बुद्ध थापा र मनोज खत्री सिनेमाटोग्राफर, सुदिप कुँवर मुख्य सहायक निर्देशक, यम प्रसाद ओली प्रोडक्सन डिजाइनर हुन्। फिल्मका संगीतकारहरू अर्जुन पोखरेल, अलमोडा राणा उप्रेती, महेश ज्ञवाली र किरण माइकल हुन्, जसमा विकास दाहालको सम्पादन, प्रवीण सिंह र रोशन विश्वकर्माको कोरियोग्राफी, हिमाल केसीको द्वन्द्व निर्देशन, राकेश दाहालको पोस्टर डिजाइन रहेको छ।
यो फिल्म फागुन २३ गतेदेखि रिलिज हुनेछ।
