आफ्ना सांगीतिक सिर्जनामार्फत मन जितिरहेका गायक हुन् प्रकाश दुतराज। संगीतमा लागेको छोटो समयमै उनले आफ्नो छुट्टै पहिचान बनाएका छन्।
यतिबेला भने प्रकाशलाई लिएर नयाँ खबर छ। उनले छिट्टै फिल्ममा डेब्यु गर्ने सम्भावना देखिएको छ।
उनलाई केही फिल्मबाट अभिनयका लागि प्रस्ताव पुगेको छ। प्रकाश फिल्मको स्क्रिप्ट समेत पढिरहेका छन्। यद्यपि, साइन भने गरिसकेका छैनन्।
सेतोपाटीसँगको कुराकानीमा यी गायकले केही निर्माता/निर्देशकसँग कुरा भइरहे पनि फाइनल हुन बाँकी रहेको बताए।
'कुरा अलि अगाडिदेखि नै भइरहेको हो। अहिले पनि केही स्क्रिप्ट पढिरहेको छु,' उनले भने, 'मलाई सुहाउने कथा, सोही अनुसारको पात्र भयो र गर्न सक्छुजस्तो लाग्यो भने जोडिन पनि सक्छु।'
फिल्ममा अभिनय गर्नु चुनौतीपूर्ण लाग्ने भएकाले सोचविचार गरेरै निर्णय लिने उनले बताए।
गीत सिर्जना
प्रकाश सर्जकका हिसाबले भने फिल्ममा अनुबन्धित भइसकेका छन्।
उनले फिल्मको नाम त खुलाएनन्। यद्यपि, कथा अनुसारको गीत बनाउने हिसाबले जोडिएको बताए। उनले यसअघि भने फिल्मका गीतमा काम गरेका छैनन्।
प्रकाशका सिर्जनाको कुरा गर्दा, 'घर कता हो बैनीको, जाम भो माइली, रिमै, रेशम' जस्ता गीत करोड क्लबमा छन्।
उनी आफ्ना प्रायः गीत आफै लेख्ने र संगीत भर्ने पर्छन्। भिडिओमा अभिनय समेत आफै गर्दै आएका छन्। यतिबेला प्रकाश स्टेज कार्यक्रममा व्यस्त छन्।
