राजन भुसाल निर्देशित फिल्म 'एक्टरः टेक वन' का दुई पोस्टर सार्वजनिक गरिएको छ।
सार्वजनिक एक पोस्टरमा प्रदिप खड्का, आना शर्मा, दिव्या रायमाझी र राजबल्लभ कोइरालालाई राखिएको छ भने अर्को पोस्टरमा प्रदिप खड्का र राजबल्लभ कोइरालालाई मात्र प्रस्तुत गरिएको छ।
विजय बस्यालले डिजाइन गरेका यी पोस्टरले फिल्मको कथा र चरित्रहरूलाई प्रभावकारी रूपमा चित्रण गर्न प्रयास गरेका छन्। एक पोस्टरले भावनात्मक सम्बन्ध र कथा सम्बन्धित पात्रहरूलाई केन्द्रमा राखेको छ भने दोस्रो पोस्टरले फिल्मको 'थ्रिलिङ' भागलाई उजागर गरेको छ।
यस फिल्मबाट अभिनेता कोइराला १० वर्षपछि ठूलो पर्दामा फर्किँदै छन्। दिव्या रायमाझीले यही फिल्मबाट आफ्नो अभिनय यात्रा सुरू गरेकी छन्, जहाँ उनलाई 'बोल्ड एन्ड ब्यूटिफूल' रूपमा प्रस्तुत गरिएको छ। दिव्या चर्चित अभिनेता दिलीप रायमाझीकी छोरी हुन्।
फिल्ममा प्रदिप, आना, दिव्या, राजबल्लभका साथै दिव्य देव, उषा रजक, सुशील सिटौलालगायतका कलाकारको मुख्य भूमिका रहेको छ। अदृत फिल्म्स र अ मोती फिल्मको संयुक्त प्रस्तुति रहेको फिल्ममा निर्माता थमन कुमार भण्डारी र सह-निर्माता अनीश भुसाल रहेका छन्। फिल्मको कथा आकाश बराल र राजन भुसालले लेखेका हुन्।
नरेन्द्र मैनालीले छायांकन गरेको फिल्मलाई निमेष श्रेष्ठले सम्पादन गरेका हुन्। संगीत हर्कुलस बस्नेत, रोहित शाक्य, र एलिस कार्कीले दिएका छन् र कोरियोग्राफी शिशिर खाती र किरण थापाले गरेका छन्। पोस्ट-प्रोडक्सन सुपरभाइजर साहिल खान रहेका छन्। यस फिल्ममा द्वन्द्व निर्देशन अष्ट महर्जनले र कला निर्देशन कृष्णमान तामाङले गरेका छन्।
यो फिल्म माघ १६ गतेदेखि प्रदर्शन हुनेछ।
