नारायण रायमाझी निर्देशित फिल्म 'परदेशी २' ओटिटी प्लेटफर्ममा रिलिज भएको छ।
गत वर्षको व्यवसायिक हिट यो फिल्म एमएसएम भिडिओ एपमा रिलिज भएको हो।
यो एपमा फिल्म रिलिज भएसँगै निर्देशक रायमाझीले अब घरमै बसेर उक्त प्लेटर्फममार्फत संसारभरका दर्शकले फिल्म हेर्न सक्ने बताए।
'परदेशी २' प्रकाश सपुतको डेब्यु फिल्म हो।
फिल्ममा उनीसहित केकी अधिकारी, वर्षा सिवाकोटी, प्रशान्त तामाङ, दीलिप रायमाझी, नीर शाह, रमा थपलिया लगायत कलाकारहरूको अभिनय छ। फिल्मको निर्माता राजेश वंशल र निर्देशक रायमाझी स्वयं हुन्।
फिल्मले युवापुस्तामा रहेको विदेश मोह, त्यसले परिवार र समाजमा पारेको प्रभावको कथा प्रस्तुत गर्छ। गीतकार समेत रहेका रमेश बिजीले यसको कथा लेखेका हुन्।
गत वर्ष दसैंमा रिलिज फिल्मले हलमा प्रदर्शनको ५१ औं दिन मनाएको थियो।
