फिल्म 'ऊनको स्वीटर' को नयाँ गीत 'मखमली' रिलिजको केही घन्टामै राम्रो भ्युजका साथ युट्युब ट्रेन्डिङमा उक्लिएको छ।
बिहीबार सार्वजनिक 'कौडा/चुट्का' मा आधारित गीतलाई शुक्रबार बिहानसम्म ४ लाखभन्दा बढीपटक हेरिएको छ। गीत युट्युबमा ट्रेन्डिङमा संगीततर्फ ४ नम्बरमा छ।
यसको भिडिओमा फिल्मका अभिनेता विपिन कार्की र अभिनेत्री मिरूना मगरबीचको अव्यक्त प्रेमलाई देखाइएको छ।
गण्डक क्षेत्रमा चर्चित मानिने यो भाका यो फिल्ममा भने पूर्वी नेपालको पाँचथरको संस्कृतिमा मिसाइएको छ। यो फिल्मको छायांकन पाँचथर र नेपाल भारत सिमाना फालेलुङमा गरिएको छ।
गीतमा स्वर सुजन चापागाईँ र सुनिता थेगिमको छ भने हर्क साउदको शब्द रचना र गायक चापागाईँकै संगीत सुन्न सकिन्छ।
यसका संगीत निर्माता कोविद बज्र हुन्। दीप गुरूङले कोरियोग्राफी गरेको यस गीतको भिडिओमा अभिनेता विल्सन बिक्रम राईलाई रोचक भूमिकामा राखिएको छ।
नवीन चौहान निर्देशित 'ऊनको स्वीटर' यसअघि म्युजिकल फिल्मबाट मन जितिरहेको आर्टमाण्डू प्रा.लि.ले निर्माण गरेको पहिलो फिचर फिल्म हो।
यो फिल्ममा विपिन र मिरूनासहित सुनिल पोखरेल, माओत्से गुरुङ, विल्सन विक्रम राई, प्रेम सुब्बा, एलेक्स पारस, परीक्षा लिम्बु, सुरज तमू, शारदा देवी सिलवाल, भावना खपाङ्गी मगर लगायत कलाकारहरूको अभिनय छ।
फिल्म निर्देशक चौहानले नै लेखेका हुन् भने लेखन सहकार्यमा सुरज कटुवाल रहेका छन्।
फिल्ममा चिन्तन राजभण्डारीको सिनेमाटोग्राफी छ भने सम्पादन कृष्ण भण्डारीले गरेका छन्।
फिल्मको एशोसियट निर्माता केन्द्र मोशन पिक्चर्स हो भने सह–निर्माताहरूमा साहाङ्ग चेम्जोङ, आशिष रिजाल, राजकुमार राई, प्रकाश बस्नेत र सन्तोष न्यौपाने छन्। कार्यकारी निर्मातामा सागर बुढाथोकी र मिलन खत्री छन्। फिल्म वितरण काफिया फिल्म्स प्रा.लि. र कुबेर सिने डिस्ट्रीब्युसनले गर्नेछन्।
फिल्म २०८२ सालको वैशाख २६ गते रिलिज हुने तयारीमा छ।
भिडिओः
