नेपाली फिल्म 'एक्लो' को क्यारेक्टर पोस्टर सार्वजनिक गरिएको छ।
साइन्स फिक्सनमा आधारित रहेर निर्माण भइरहेको फिल्मका मुख्य दुई पात्रको क्यारेक्टर पोस्टर सार्वजनिक गरिएको हो।
हलिउड कलाकार जेमी बेकम र डान्सर तथा अभिनेत्री कविता नेपालीको पोस्टर सार्वजनिक गरिएको हो। पोस्टरमा जेमीलाई 'ज्याक' र कवितालाई 'एरियल' चरित्रका रूपमा चिनाइएको छ।
यो फिल्मलाई प्रदीप शाहीले निर्देशन गरेका हुन्। लामो समयदेखि बेलायत बस्दै आएका शाहीले 'एक्लो' लाई हलिउड स्तरको बनाउने तयारीका साथ काम गरिएको बताएका छन्। हाल फिल्मको लण्डनमा पोस्ट प्रोडक्सनको काम भइरहेको छ।
यो फिल्ममा प्रदीप खड्का, विजय लामा, सुनील थापा, दिया पुन, वेनिशा हमाल लगायतको पनि शीर्ष अभिनय छ। साथमा दिनेश डीसी, सुरज सिँह ठकुरी, त्रिचु राई, कृष्णभक्त महर्जन, विकास अधिकरी, दिग्गज खत्री , विनोदकुमार सुवेदी क्षितिज, श्रीशेष श्रेष्ठ र बाल कलाकार जेमिन श्रेष्ठ र स्योन सविक सिँहलगायतले पनि अभिनय गरेका छन्।
फिल्मका निर्माता राजु कुमार गुरूङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा, बागवीर पुन हुन् भने कार्यकारी निर्मातामा विनोद सुवेदी क्षितिज छन्। बाबु श्रेष्ठले फिल्म छायांकन गरेका हुन्।
फिल्म सन २०२५ मा प्रदर्शनमा आउनेछ। आधिकारिक प्रदर्शन मिति भने फिल्मको सम्पूर्ण कार्य सकिएपश्चात मात्र घोषणा गर्ने निर्देशक शाहीले बताए।
