म्युजिकल फिल्मबाट दर्शकको मन जितिरहेको आर्टमाण्डुले निर्माण गरेको पहिलो फिचर फिल्म 'ऊनको स्वीटर' को प्रदर्शन मिति घोषणा गरिएको छ।
विपिन कार्की र मिरूना मगर अभिनीत यो फिल्म आगामी वैशाख २६ गते रिलिज हुने भएको छ।
निर्माताले सोमबार फिल्मको आधिकारिक पोस्टर सार्वजनिक गर्दै प्रदर्शन मिति घोषणा गरेका हुन्।
सार्वजनिक पोस्टरमा डोको बोकिरहेका विपिनले हातमा डायरी लिएका छन्। पछ्यौरी ओढेकी मिरूना मन्द मुस्कानमा देखिएकी छन्। त्यसको तलपट्टी विपिन र मिरूनालाई फोटो खिच्नका लागि पोज दिइरहेको अवस्थामा देखाइएको छ।
'ऊनको स्वीटर' नवीन चौहानले निर्देशन गरेका हुन्। फिल्ममा विपिन र मिरूनाका साथमा सुनील पोखरेल, माओत्से गुरूङ, विल्सनविक्रम राई, प्रेम सुब्बा, एलेक्स पारस, परीक्षा लिम्बू, सुरज तमू, शारदादेवी सिलवाल, रत्न सुब्बा, मेनुका प्रधान लगायत कलाकारको अभिनय छ।
फिल्मको लेखन पनि निर्देशक चौहानले गरेका हुन्।
फिल्ममा सुजन चापागाईंको संगीत निर्देशन, कोबिद बज्रको ब्याकग्राउण्ड म्युजिक छ। गीत रचना हर्क साउद र युवराज काफ्लेले गरेका छन्।
फिल्मको एसोसिएट निर्मातामा केन्द्र मोसन पिक्चर्स छ भने सह–निर्मातामा साहाङ चेम्जोङ, आशिष रिजाल, राजकुमार राई, प्रकाश बस्नेत र सन्तोष न्यौपाने छन्। कार्यकारी निर्माता सागर बुढाथोकी र मिलन खत्री छन्।
फिल्मको अधिकांश छायांकन पाँचथरमा गरिएको छ।
