नेपाली र भारतीय कलाकारहरू अभिनीत फिल्म 'ह्रस्व दीर्घ' शुक्रबारदेखि नेपालभरका हलमा रिलिज हुँदैछ।
मल्टिप्लेक्स हलहरूले फिल्मको अग्रिम टिकट बिक्री सुरू गरिरहेका छन्।
यो फिल्मको केही दिनअघि ट्रेलर सार्वजनिक गरियो। जसले राम्रो हाइप बनाइरहँदा दक्षिण भारतीय अभिनेता ब्रह्मानन्दमको डबिङ (आवाज) नसुहाएको भनेर आलोचना समेत भइरहेको छ।
अभिनेता हरिहर अधिकारी फिल्म हेरेपछि दर्शकले त्यो गुनासो नगर्ने बताउँछन्। उनका अनुसार फिल्ममा ब्रह्मानन्दम पण्डितको भूमिकामा छन्। जो भारतको बनारसमा संस्कृत पढेर नेपाल फर्किएका छन्।
'उहाँले फिल्ममा हिन्दी शुद्ध बोल्नुहुन्छ। नेपाली टुटेफुटेको बोल्नुहुन्छ,' हरिहरले भने, 'हामीले ट्रेलरमा हिन्दी नराखौं। बरू टुटेफुटेको नेपाली राखौं भनेर राखेका हौं।'
निर्मात्री तथा अभिनेत्री नीता ढुंगानाले फिल्म हेरेपछि दर्शकहरू 'कन्भिन्स' हुने बताइन्। उनका अनुसार ट्रेलरको आवाज ब्रह्मानन्दम स्वयंमको हो। नेपाली र हिन्दी दुबै भाषामा उनले आवाज दिएका छन्।
'ब्रह्मानन्दम सरलाई नेपाली आवाजमै दर्शकमाझ पुर्याउन खोजिएको हो,' नीताले भनिन, 'उहाँको आवाजलाई लिएर जति पनि कुरा आइरहेको छ। फिल्म हेरेपछि दर्शकहरू स्पष्ट हुनुहुन्छ।'
यो फिल्म नेपालमा नेपाली र हिन्दीमा एकसाथ रिलिज हुने भनिए पनि हिन्दी एक सातापछिका लागि सारिएको उनले बताइन्।
तराई भेगमा फिल्म हिन्दीमा रिलिज हुने नीताको भनाइ छ।
चन्द्र पन्त निर्देशित 'ह्रस्व दीर्घ' मा नीता र हरिहरका साथमा प्रदीप रावत, ब्रह्मानन्दम, बिपना थापा, सुनील वर्मा, कबीर दुहान, रेखा थापा, सरोज खनाल, सञ्चिता लुईँटेल, किरण केसी, रवीन्द्र झा, गरिमा शर्मा, बुद्धि तामाङ, निर्मल शर्मा, प्रशान्त ताम्राकार लगायत कलाकारको अभिनय छ।
फिल्ममा ६ करोड हाराहारी लगानी भएको जनाइएको छ।
