साउन १८ गते रिलिज हुने नेपाली फिल्म 'मोदीबेनी' को पहिलो गीत सार्वजनिक गरिएको छ।
सोमबार काठमाडौंमा आयोजित कार्यक्रमकाबीच 'मन्जुरी' शीर्षकको रोमान्टिक गीत सार्वजनिक गरिएको हो।
यसको भिडिओमा अभिनेत्री वर्षा शिवाकोटी र नव-अभिनेता अमर प्रताप श्रेष्ठलाई प्रस्तुत गरिएको छ। फिल्मको एक महत्वपूर्ण अंशको रूपमा रहेको गीतले वर्षा र अमरको प्रेम अंकुरणदेखिको यात्रालाई चित्रण गरेको छ।
यस गीतमा एसडी योगी र विज्ञानी पराजुलीको स्वर छ।
एसडीकै संगीत, राम अविरल विष्टको शब्द रचना रहेको गीतका संगीत निर्माता रिकेश गुरूङ हुन्। किरण थापाले भिडिओको कोरियोग्राफी गरेका हुन्।
कार्यक्रममा नव-अभिनेता अमर प्रतापले आफ्नो अभिनयको पहिलो पाइलामा नै सशक्त टिमसँग काम गर्न पाउँदा खुसी लागेको बताए।
अभिनेत्री वर्षा सिवाकोटीले फिल्म सुन्दर बनेको बताइन्। 'यो फिल्मको टिम नयाँ भए पनि सशक्त छ। म यसको हिस्सा बन्न पाउँदा खुसी छु,' उनले भनिन्, 'फिल्मले हाम्रै आफ्नो कथा भन्छ। र, यसमा विश्वास नलाग्ने सामाजिक घटना देख्न सकिनेछ।' उनले आफ्नो जोडीको रूपमा यस फिल्ममा देखिने कलाकार अमरको कामको समेत तारिफ गरिन्।
अभिनेता सरोज खनालले फिल्मलाई दर्शकले मन पराउने अपेक्षा रहेको बताए।
शंकर कोइरालाको निर्देशनमा बनेको ‘मोदीबेनी’ मा वर्षा, अमर र सरोजका साथमा प्रविण खतिवडा, रेजिना उप्रेती, दिलीप केसी, स्नेहा भट्टराई, जीवन भट्टराई, हिउँवाला गौतम, कमलमणि नेपाल, सुब्रतराज आचार्य लगायतको अभिनय छ।
डिनेस्ट इन्टरटेनमेन्टको प्रस्तुतिमा बनेको फिल्मलाई आनन्द विक्रम क्षेत्रीले लेखेका हुन्। दिलीप केसी निर्माता रहेको फिल्ममा उत्सव दाहालको छायांकन, भरत रेग्मीको सम्पादन छ।
फिल्मलाई रिच इन्टरटेन्मेन्ट र एफडी कम्पनीले वितरण गर्दैछन्।
