सुदर्शन थापा निर्देशित फिल्म 'सम्हालिन्छ कहिले मन' आगामी भदौ १७ गतेदेखि प्रदर्शन हुँदैछ।
यो कोरोना महामारीअगाडि नै छायांकन गरिएको फिल्म हो। त्यो बेला बनेका र रोकिएका थुप्रै फिल्म अहिले धमाधम प्रदर्शन भइरहेका छन्। एक सातामा दुई-तीनवटा फिल्म प्रदर्शन भइरहे पनि 'कबड्डी ४' पछि कुनै फिल्मले राम्रो व्यापार गर्न सकेको छैन।
यसैबीच आउन लागेको छ नयाँ फिल्म 'सम्हालिन्छ कहिले मन'। के यसलाई दर्शकले मनपराऊलान्?
यसबारे फिल्मकी अभिनेत्री पूजा शर्मा भन्छिन्, 'पछिल्लो समयमा रिलिज भएकाभन्दा सम्हालिन्छ कहिले मन फरक स्वादको छ। दर्शकले मन पराउनुहुन्छ भन्ने विश्वास छ।'
'सम्हालिन्छ कहिले मन' त्रिकोणात्मक प्रेम कथामा आधारित छ।
फिल्म छायांकन विदेशका विभिन्न ठाउँमा गरेको जानकारी दिँदै उनले भनिन्, 'विदेशमा छायांकन गर्दैमा फिल्म राम्रो हुन्छ भन्ने होइन। तर हामीले फिल्मका लागि धेरै मेहनत गरेका छौं।'
यो फिल्मको नाम गायक सुगम पोखरलको चर्चित गीत 'सम्हालिन्छ कहिले मन' बाट लिइएको हो। सुगमको स्वरमा रहेको गीत फिल्ममा पनि छ। आफ्नो समयमा एकदमै रूचाइएको यो गीतलाई फिल्मले न्याय गर्न सक्छ कि सक्दैन भन्ने त रिलिज भएपछि नै थाहा हुनेछ।
पूजा भने आफूहरूले राम्रो काम गरेकाले फिल्म सफल हुनेमा आशावादी रहेको बताउँछिन्।
'सुगम दाइले हामीलाई विश्वास गरेर आफ्नो हिट गीत दिनुभएको छ। त्यसको स्तरमा पुग्न सक्छौं कि सक्दैनौं थाहा छैन। तर हामीले राम्रो काम गरेका छौं। फिल्म भनेको मनोरञ्जन हो र सम्हालिन्छ कहिले मन यस्तै फिल्म हो।'
अभिनेता आकाश श्रेष्ठ पनि यो फिल्ममा धेरै मेहनत लागेको बताउँछन्। दर्शकले फिल्मको ट्रेलर रूचाएको भन्दै उनले फिल्म पनि रूचाउनेमा आशा व्यक्त गरे।
अर्का अभिनेता सोनम तोप्देनका लागि यो फिल्म अझ विशेष छ। कभर गीतहरू गाएर गायन क्षेत्रमा चर्चा कमाएका सोनमको यो पहिलो फिल्म हो। त्यसैले पनि सम्हालिन्छ कहिले मन प्रदर्शनमा आउन लाग्दा उनी उत्साहित छन्।
पहिलो फिल्म भए पनि सोनमले राम्रो काम गरेको बताउँछन् उनका सहकर्मी पूजा र आकाश। पूजाले त सोनमका केही गीत पहिलै हेरिसकेकी थिइन्। सोनमलाई फिल्मका लागि उनलै रोजेकी थिइन्।
सोनमलाई किन रोज्नुभयो भन्ने प्रश्नमा पूजा भन्छिन्, 'हामीले सबभन्दा पहिला लुक्स नै हेर्छौं। अनि ऊ भगवानप्रति विश्वास गर्ने व्यक्ति रहेछ। म पनि भगवानप्रति विश्वास गर्ने भएर आकर्षित भएकी हुँ।'
गीत-संगीतमा रमाइरहेका सोनमले पहिले फिल्ममा काम गर्ने सोचेका थिएनन्।
उनले भने, 'मसँगै गीत गाउने साथीले पूजा शर्माले सम्पर्क गर्न खोज्नुभएको छ भन्दा म छक्क परेँ।'
पूजासँग कुरा भएपछि उनले फिल्मबारे जानकारी दिइन्। आफूलाई आएको काम खुसी हुँदै स्वीकार गरेको सोनम बताउँछन्।
'क्यामरा त मैले पहिलादेखि फेस गरिरहेको हो। फिल्ममा केही गाह्रो-अप्ठ्यारो पर्दा बेला पूजा र आकाशले सहज बनाइदिनुभयो,' उनले भने।
पूजा, आकाश र सोनमले 'सम्हालिन्छ कहिले मन' मा काम गर्दाको केही रमाइला क्षणका अनुभव सेतोपाटीसँग साटेका छन्।
हेर्नुहोस् उनीहरूसँग सेतोपाटीका संगीता गिरीले गरेको भिडिओ कुराकानी–
