जर्मन बुन्डेसलिगाको शीर्षस्थानमा रहेको बायर्न म्युनिखले युइएफए च्याम्पियन्स लिगको क्वार्टरफाइनलको पहिलो लेगमा हार बेहोरेको छ। बायर्न स्पेनिस क्लब भिल्लारियलसँग उसकै मैदानमा १–० ले स्तब्ध भएको हो।
घरेलु मैदानमा भिल्लारियललाई जिताउन एर्नाउट डानजुमाले निर्णायक गोल गरे।
उनले खेलको आठौं मिनेटमा ड्यानियल पारेजोको पासमा गोल गर्दै टोलीलाई सुरूआती अग्रता दिलाएका थिए।
उक्त सुरूआती अग्रता जोगाउँदै घरेलु टोलीले बायर्नमाथि जित निकाल्न सफल भयो।
यो जितसँगै भिल्लारियलले सेमिफाइनल पुग्ने सम्भावना बलियो बनाएको छ। अब दोस्रो लेगमा यही नतिजा कायम राख्न सके भिल्लारियल सेमिफाइनलमा प्रवेश गर्नेछ।
तर बायर्नलाई सेमिफाइनलमा प्रवेश गर्न घरेलु मैदानमा कम्तीमा २–० को जित अन्तरम आवश्यक हुन्छ। दोस्रो लेग मार्च १२ मा एलिएन्ज एरिना म्युनिखमा हुनेछ।
