चेल्सी इंग्लिस प्रिमियर लिग फुटको चौथो स्थानमा उक्लियो


वेष्ट ब्रोमलाई हराउँदै चेल्सी इंग्लिस प्रिमियर लिग फुटको चौथो स्थानमा उक्लिएको छ।

लिग अन्तर्गत सोमबार राति घरेलु मैदानमा भएको खेलमा चेल्सीले वेष्ट ब्रोमलाई ३–० ले हराएको हो ।

चेल्सीको जितमा इडन हजार्डले दुई तथा विक्टर मोसिसले एक गोल गरे। २५ औँ मिनेटमा हजार्डको पहिलो गोलबाट चेल्सीले पहिलो हाफमा १–० को अग्रता लियो ।

६३ औँ मिनेटमा मोसिसले गोल गर्दै चेल्सीको अग्रता दोब्बर पारे । ७१ औँ मिनेटमा हजार्डले व्यक्तिगत दोस्रो गोल गरेपछि चेल्सी ३–० ले विजयी भयो ।

यसअघिका खेलमा बोर्नमाउथ र वाट्फोर्डसँग पराजित भएको चेल्सीलाई वेष्ट ब्रोममाथिको जितले राहत दिएको छ । चेल्सीले लिगमा सन् २०१८ मा घरेलु मैदानमा पहिलो जित दर्ता गरेको हो ।

जितपछि चौथो स्थानमा उक्लिएको चेल्सीको २७ खेलबाट ५३ अंक भएको छ । पाँचौँ स्थानमा झरेको टोटनह्यामको ५२ अंक छ । पुछारमा रहेको वेष्ट ब्रोमको २० अंक मात्रै छ ।

Share:

© 2017 Setopati Sanchar Pvt. Ltd.