मेसीले २ मिनेटभित्र २ गोल गरेपछि बार्सिलोना क्वाटरफाइनलमा


 

मेसीले दुई गोल गरेपछि बार्सिलोनाले सेल्टा भिगोलाईलाई फराकिलो अन्तरमा हराउँदै स्पेनिस कोपा डेल रे फुटबलको क्वाटरफाइनलमा प्रवेश गरेको छ।

बिहीबार राति भएको अन्तिम १६ को दोस्रो लेगमा अर्जेन्टाईनी स्ट्राईकर लियोनल मेस्सीले पहिलो हाफको १५ मिनेटभित्रै दुई गोल गरेपछि सेल्टा भिगोविरुद्धको दोस्रो लेगको खेल बार्सिलोनाले ५ – ० ले जित्यो।

घरेलु मैदानमा भएको दोस्रो लेगमा बार्सिलोनालाई जिताउन मेसीले दुई तथा लुइस स्वारेज, जोर्डी अल्बा र इभान राकिटिकले समान एक एक गोल गरे।

यो जितसँगै बार्सिलोनाले समग्रमा ६ – १ को जितसहित  क्वाटरफाइनलमा स्थान बनाएको हो। सेल्टाको मैदानमा भएको पहिलो लेग १ – १ गोलको बराबरीमा सकिएको थियो।

नाउ क्याम्पमा मेसीले दुई मिनेटमा दुई गोल गर्दै बार्सिलोनालाई सुरुवाती अग्रता दिलाएका थिए। मेस्सीले खेलको १३  औं र १५ औं मिनेटमा गोल गरेर बार्सिलोनालाई सुरूवाती १५ मिनेट भित्र नै २ – ० को अग्रता दिलाए। खेलको २८ औं मिनेटमा अल्बाले गोल गर्दा बार्सिलोनाको अग्रता ३ – ० ले अघि रह्यो। ३१ औं मिनेटमा स्वारेजले गोल गर्दै पहिलो हाफमा बार्सिलोनालाई ४ – ० को अग्रता दिलाए।

पहिलो हाफमा ४ – ० ले अघि रहेको बार्सिलोनाले दोस्रो हाफमा थप एक गोल गर्‍यो। सेल्टाबिरुद्ध एकतर्फी खेलेको बार्सिलोनाले ८७ औं मिनेटमा राकिटिकको गोलबाट ५ – ० को अग्रता बनायो। त्यसपछि थप गोल हुन् सकेनन् र खेल बार्सिलोनाले सहजै आफ्नो बनायो।

कोपा डेल रे अन्तर्गत नै बिहिबार राति दोस्रो लेगमा जित निकाल्दै सेभिया र स्पानियोल पनि अन्तिम आठमा प्रवेश गरेका छन्। योसँगै कोपा डेल रेको अन्तिम आठमा पुग्ने सबै टोलीको टुंगो लागेको छ। रियल मड्रिड, एथ्लेटिको मड्रिड, भ्यालेन्सिया, लेगानेस र अलाभेसले यसअघि नै क्वाटरफाइनलमा स्थान पक्का गरिसकेको छ।

Share:

© 2017 Setopati Sanchar Pvt. Ltd.