आइसिसी टी-२० विश्वकप २०२६ शनिबारदेखि भारत र श्रीलंकमा सुरू हुँदैछ।
दसौं संस्करणको यो प्रतियोगितामा नेपालले तेस्रोपटक सहभागिता जनाउन लागेको हो। समूह ‘सी’ मा रहेको नेपालले विश्वविजेताद्वय इंग्ल्यान्ड र वेस्ट इन्डिजसहित स्कटल्यान्ड र इटालीसँग प्रतिस्पर्धा गर्नेछ।
नेपालले समूहका आफ्ना चारै खेल मुम्बईस्थित वाङखेडे रंगशालामा खेल्नेछ। विश्वकपका लागि नेपालको १५ सदस्यीय टोलीमा शेर मल्ल मात्र डेब्यू गर्न बाँकी छ। सोमपाल कामीले तेस्रो पटक टी-२० विश्वकप खेल्दैछन् भने ९ खेलाडीले दोस्रो पटक विश्वकप खेल्न लागेका छन्। शेरसहित ५ खेलाडी पहिलो पटक विश्वकपमा सहभागी हुनेछन्। आरिफ शेख, बसिर अहमद, नन्दन यादव, शेर मल्ल र लोकेश बमले पहिलोपटक विश्वकप खेल्न लागेका हुन्।
रोहित पौडेल (कप्तान), आसिफ शेख, कुशल भुर्तेल, दीपेन्द्रसिंह ऐरी, गुल्सन झा, ललित राजवंशी,करण केसी,सन्दीप जोरा र सन्दीप लामिछाने गरी ९ खेलाडीले भने लगातार दोस्रोपटक विश्वकप खेल्ने टोलीमा स्थान बनाएका हुन्।
१५ सदस्यीय नेपाली टोलीका खेलाडीका विशेषताबारे जान्नुहोस् :-
कुशल भुर्तेल (ओपनिङ ब्याटर)
कुशल भुर्तेल नेपाली क्रिकेट टोलीका आक्रामक ओपनिङ ब्याटर हुन्। पावर हिटिङ, छिटो स्कोर बनाउने र इनिङ्सलाई आक्रामक रूपमा सुरु गर्ने क्षमता उनको मुख्य विशेषता हो।
उनी फिल्डिङ र बलिङमा पनि योगदान दिन सक्छन्, जसले नेपाली टोलीलाई थप बलियो बनाउनेछ। कुशलका बुवा दीपक भुर्तेल क्रिकेटका ठूला प्रशंसक हुन्। यसैकारण छोरालाई क्रिकेटमा प्रेरित गरे। उनीबारे थप पढ्नुहोस्:- नेपाली टोलीका आक्रामक ओपनर कुशल
आसिफ शेख (विकेटकिपर ब्याटर)
आसिफ शेख ओपनिङ ब्याटर तथा विकेटकिपर दुवै भूमिकामा उत्कृष्ट छन्।
इनिङ्सको सुरुवातमा स्थिरता दिने, राम्रो टेक्निक र दबाबमा पनि राम्रो खेल्ने क्षमता उनमा छ।
विकेट किपिङमा उनी नेपाली टोलीको पहिलो रोजाइ हुन्। आसिफले भारतमा यसपटक विश्वकप खेलेसँगै आफ्नो दोस्रो टी-२० विश्वकप को अनुभव लिनेछन्। नेपाली टोलीको टप अर्डर र विकेट किपिङको मुख्य आधार आसिफ हुने पक्का छ। उनीबारे थप पढ्नुहोस्:-विकेटकिपिङ गर्ने नेपाली टिमका भरपर्दा ओपनर आसिफ
रोहितकुमार पौडेल (टपअर्डर ब्याटर)
रोहित पौडेल धैर्यपूर्वक ब्याटिङ गर्ने खेलाडी हुन्।
२० वर्षको उमेरदेखि कप्तानी सम्हाल्दै आएका उनी अहिले अनुभवी भइसकेका छन्। उनी नेपाली क्रिकेटको मुख्य आधारस्तम्भ र नेतृत्वकर्ता हुन्।
तोस्रो नम्बरमा ब्याटिङ गर्ने रोहितमा इनिङ्सलाई एकरुपकता दिने र दबाबमा पनि राम्रो प्रदर्शन गर्ने क्षमता छ।
टी-२० विश्वकप २०२६ मा उनले नेपाली टोलीका लागि महत्वपूर्ण भूमिका खेल्ने अपेक्षा गरिएको छ। उनको धैर्य, नेतृत्व कौशल र ब्याटिङ परिपक्वताले नेपाली क्रिकेट टोलीलाई बलियो बनाएको छ।
उनीबारे थप पढ्नुहोस्:- कान्छा तर अनुभवी कप्तान रोहित
सन्दीप जोरा (ब्याटर)
सन्दीप जोरा मध्यक्रमका ब्याटर हुन्।
आक्रामक शैलीमा खेल्ने, छिटो रन बनाउने र दबाबपूर्ण अवस्थामा पनि इनिङ्सलाई अगाडि बढाउने क्षमता उनको मुख्य क्षमता हो। नेपाली टोलीको मिडल अर्डरलाई मजबुत बनाउने महत्वपूर्ण खेलाडी सन्दीप हुन सक्छन्।
विभिन्न घरेलु तथा अन्तर्राष्ट्रिय खेलहरूमा उनले राम्रो प्रदर्शन गरेका छन्, विशेष गरी टी२० फर्म्याटमा विस्फोटक इनिङ्स खेल्ने उनको क्षमता छ। उनीबारे थप पढ्नुहोस्:- मध्यक्रमका जोडदार ब्याटर सन्दीप जोरा
लोकेश बम (ब्याटर)
लोकेश विस्फोटक ब्याटर हुन्, उनी छोटो समयमा ठूलो स्कोर बनाउन सक्छन्। आक्रामक शैली र पावर हिटिङ उनको मुख्य क्षमता हो।
२०१८ मा १७ वर्षको उमेरमा उनले पोखरा प्रिमियर लिगमा तीन देशका पूर्वकप्तानको टोलीविरुद्ध अर्धशतक प्रहार गरेर ठूलो ध्यान खिचे। यो प्रदर्शनले उनलाई राष्ट्रियस्तरमा चर्चित बनायो।
बुबाले क्रिकेट खेल्न रोकेपछि पनि उनी आमासँग अड्डी कसेर क्रिकेट खेल्ने अठोट गरे। त्यसपछि धनगढी क्रिकेट एकेडेमीमा भर्ना भए, जहाँ सुरुमा बलिङ गरे तर पछि ब्याटिङमा फोकस गरे। उनी परिस्थितअनुसार ओपनिङदेखि मिडल र लोअर अर्डरमा आक्रामक ब्याटिङ गर्न सक्छन्। उनीबारे थप पढ्नुहोस्:- तीन देशको पूर्वकप्तानका टोलीविरूद्ध अर्धशतक हानेर चर्चामा आएका विस्फोटक लोकेश
दीपेन्द्रसिंह ऐरी (अलराउन्डर)
दीपेन्द्र छिटा र फुर्तिला अलराउन्डर हुन्।
फिल्डिङमा अत्यन्त छिटो र प्रभावकारी, बलिङमा विविधता र ब्याटिङमा आक्रामक तथा स्थिर दुवै प्रदर्शन गर्न सक्ने उनको क्षमता छ। उनको गति, ऊर्जा र आक्रामक शैलीका कारण 'टाइगर' उपनामले चिनिन्छन्।
विपक्षीका लागि डरलाग्दो र टिमका लागि बहुमूल्य खेलाडी हुन् दीपेन्द्र नेपाली क्रिकेटका सबैभन्दा पूर्ण अलराउन्डर मध्ये एक हुन्। नेपाली क्रिकेटको आशा र वर्तमानको मुख्य आधार दीपेन्द्रलाई मान्न सकिन्छ। उनीबारे थप पढ्नुहोस्:- चितुवाभन्दा फुर्तिला 'टाइगर' दीपेन्द्र
गुल्सन झा (अलराउन्डर)
गुल्सन नेपाली टोलीका प्रतिभाशाली युवा अलराउन्डर हुन् जसले बलिङ र ब्याटिङ दुवैमा विपक्षीलाई दबाब दिन सक्छन्। विशेषगरी उनको आक्रामक शैली र परिस्थिति अनुसार खेल्ने क्षमताले विपक्षी खेलाडीलाई तनाव दिन्छ।
नेपाली क्रिकेटमा युवा तथा उदीयमान अलराउन्डर उनले विभिन्न टी-२० र एकदिवसीय खेलमा नेपालका लागि महत्वपूर्ण योगदान दिएका छन्। विशेषगरी दबाबपूर्ण अवस्थामा इनिङ्स बचाउने वा आक्रमण गर्ने क्षमता उनमा छ। ऊर्जाशील, प्रतिभाशाली र सम्भावना बोलेका खेलाडी गुल्सन नेपाली क्रिकेटको भविष्य हुन्। उनीबारे थप पढ्नुहोस्:- विपक्षीका लागि 'टेन्सन', अलराउन्डर गुल्सन
आरिफ शेख (ब्याटर)
आरिफ शेख नेपाली टोलीको ब्याटिङका आधारस्तम्भ हुन्। आरिफ मिडल अर्डरमा स्थिरता र विश्वसनीयता दिने प्रमुख ब्याटर हुन्। दबाबपूर्ण अवस्थामा पनि राम्रो खेल्ने, इनिङ्सलाई लम्ब्याउने र टिमलाई बलियो स्थिति दिन सक्ने क्षमता उनमा छ।
आरिफ नेपाली क्रिकेटका युवा तथा अनुभवी पुस्ताका बीचमा पुल बन्ने खेलाडी हुन्। उनले एकदिवसीय र टी-२० मा नेपालका महत्वपूर्ण इनिङ्स खेलेका छन् र नेपालको ब्याटिङ लाइनअपलाई मजबुत बनाएका छन्। नेपाली क्रिकेटको मिडल अर्डरको भरोसा र आधार टी-२० विश्वकपमा उनी बन्ने सक्नेछन्।
निरन्तरता, परिपक्व ब्याटिङ र टिमका लागि योगदान उनको बलियो पक्ष हो। उनीबारे थप पढ्नुहोस्:- मिडल अर्डरको आधारस्तम्भ आरिफ
बसिर अहमद (अलराउन्डर)
बसिर अहमद बलिङ र ब्याटिङ दुवैमा एकरुपको प्रदर्शन गर्न सक्ने बायाँ हाते खेलाडी हुन्। बलिङमा नियन्त्रण र विकेट लिने क्षमता तथा ब्याटिङमा दबाबमा पनि राम्रो स्कोर बनाउने क्षमता उनको मुख्य विशेषता हो।
उनी टिमको मिडल अर्डरमा ब्याटिङ गर्न सक्छन् र बलिङमा पनि उपयोगी विकल्प बन्छन्, विशेष गरी स्पिन गतिको विकल्पको रूपमा।
उनीबारे थप पढ्नुहोस्:- बलिङ-ब्याटिङ दुवैमा स्थिरता दिने बायाँ हाते बसिर
सोमपाल कामी (बलिङ अलराउन्डर)
सोमपाल नयाँ बलले विपक्षी ब्याटरहरूलाई सिकार बनाउने क्षमता भएका अनुभवी खेलाडी हुन्।
करियरको सुरुवात ब्याटरको रूपमा गरेका उनी पछि तीव्र गतिका बलर बने र हाल अलराउन्डरको भूमिकामा छन्। उनी नेपाली टोलीबाट सबैभन्दा बढी तीन पटक टी-२० विश्वकप खेल्ने एक्ला खेलाडी बन्न लागेका छन्।
सन् २०१३ को अन्त्यमा नेपाल आएलगत्तै टी-२० विश्वकप खेल्ने अवसर पाएका उनले सन् २०२४ मा अमेरिका र वेस्ट इन्डिजमा भएको विश्वकप पनि खेलेका थिए। नयाँ बलमा प्रभावकारी बलिङ र अलराउन्ड योगदानको उनको क्षमता हो। उनीबारे थप पढ्नुहोस् :- नयाँ बलले सिकार गर्ने अनुभवी सोमपाल
करण केसी (बलिङ अलराउन्डर)
करण केसी हार्न लागेको खेललाई पनि जिताउन सक्ने अलराउन्डर हुन्।
बलिङ र ब्याटिङ दुवैमा महत्वपूर्ण योगदान दिन सक्छन्, विशेष गरी दबाबपूर्ण अवस्थामा। सिनियर खेलाडी भइसकेका करण आइसिसी टी-२० विश्वकप २०२६ मा खेल्दा 'नोस्टाल्जिक' हुनेछन्। किनभने उनले क्रिकेट भारतमा सिकेका थिए र अब उनी भारतमै टी-२० विश्वकपका लागि तयार छन्। भरपर्दा बलिङ अलराउन्डर करणमा अनुभवसँगै दबाबमा प्रदर्शन गर्ने क्षमता छ। उनले सुरुवाती ओभरमा बलिङ र तल्लोक्रममा नेपाली ब्याटिङलाई योगदान दिनेछन्।
उनीबारे थप पढ्नुहोस् :- हार्न लागेको खेल समेत जिताउन सक्ने अलराउन्डर करण
सन्दीप लामिछाने (लेग स्पिनर)
नेपाल क्रिकेट टोलीका प्रमुख लेगस्पिनर सन्दीप लामिछाने नेपाली बलिङ विभागको मुख्य भरोसा हुन्।
उनी नेपाली बलिङका सबैभन्दा ठूलो र भरपर्दो हतियार हुन्। लेगस्पिनरको रूपमा उनको गुणस्तर र प्रभावले नेपाली क्रिकेटलाई अन्तर्राष्ट्रिय स्तरमा चिनाएको छ। उनले टी-२० र एकदिवसीय खेलमा नेपालका लागि महत्वपूर्ण विकेट लिएका छन् र बलिङ आक्रमणलाई नेतृत्व दिएका छन्। उनी नेपाली क्रिकेट इतिहासका सबैभन्दा सफल स्पिनरमध्ये एक हुन्। उनको आत्मविश्वास र परिपक्वताले टोलीलाई बलियो बनाएको छ। उनीबारे थप पढ्नुहोस् :- नेपाली बलिङका भरोसा लेगस्पिनर सन्दीप
ललित राजवंशी (बायाँ हाते स्पिनर)
बायाँ हाते स्पिनर ललित राजवंशी किफायती बलर हुन्। उनको क्षमता कम रन दिने र विकेट लिने हो। एक क्रिकेट खेलाडीले आफ्नो सीपलाई निरन्तर परिमार्जन र अपडेट गरिरहनुपर्छ भन्ने उनको भनाइ छ। उनले आफ्नो बलिङलाई समयसँगै सुधार्दै लगेका छन्। ललित खेल नियन्त्रणमा राख्ने सक्ने स्पिनरको हुन्। उनका कारण नेपाली क्रिकेट टोलीको स्पिन विभागलाई बलियो बनाएको छ।
उनीबारे थप पढ्नुहोस् :- किफायती बायाँ हाते स्पिनर ललित
नन्दन यादव (बलर)
नेपाली क्रिकेट टोलीका मध्यम गतिका बलर नन्दन कुमार यादव सुझबुझपूर्ण र बुद्धिमानीपूर्ण बलिङका लागि चिनिन्छन्। नन्दनले दशक लामो क्रिकेट करियरपछि उनी झन्डै अस्ट्रेलिया पलायन भएका थिए। तर त्यहाँको अनुभव र एक प्रतियोगिताले उनको क्रिकेट यात्रालाई फेरि मोडिदियो।
अस्ट्रेलियामा क्रिकेट खेलेपछि उनको बलिङमा धेरै परिष्कृत र सुधार आयो। नेपाल प्रिमियर लिगको पहिलो संस्करणमा कर्णाली याक्स टोलीका लागि उनले उत्कृष्ट प्रदर्शन गरे। विशेष गरी डेथ ओभरहरूमा उनको बलिङले सबैको ध्यान खिच्यो र प्रशंसा कमायो। उनको मध्यम गतिको बलिङ सुझबुझपूर्ण छ।
रणनीति र परिस्थिति अनुसारको बलिङ उनको मुख्य विशेषता हो। उनीबारे थप पढ्नुहोस् :- सुझबुझपूर्ण बलिङ गर्ने मध्यम गतिका नन्दन
शेर मल्ल (स्पिनर)
शेर मल्ल एनपिएलमा लगातार दुई उपाधि जित्ने एक मात्र खेलाडी (पहिलो सिजन जनकपुर बोल्ट्सबाट, दोस्रो लुम्बिनीबाट) हुन् । दोस्रो सिजनमा उनी 'मिस्ट्री' स्पिनरको उपनामले चर्चित बने। पावरप्लेमा विकेट लिने र दबाबमा ठूला सट खेल्ने क्षमता उनमा छ।
दोस्रो सिजनको एनपिएलको प्रदर्शनपछि उनलाई टी-२० विश्वकप २०२६ का लागि नेपालको १५ सदस्यीय टोलीमा पहिलो पटक छनोट गरियो। उनी विश्वकपका लागि परेका एक मात्र नयाँ खेलाडी हुन्। बाल्यकालमा परिवारसँग भारतको पञ्जाबमा बसे, गल्ली क्रिकेट र स्कुल स्तरमा खेलेका थिए। अब उनले विश्वकपमा डेब्यू गर्दै इतिहास रच्चे सम्भावना छ।
उनीबारे थप पढ्नुहोस् :- एनपिएलबाट उदाएका 'मिस्ट्री' स्पिनर शेर
-1746009348.jpg)
