भारतले एसिया कप २०२५ का लागि राष्ट्रिय क्रिकेट टोली घोषणा गरेको छ। युएईमा सेप्टेम्बर ९ देखि टी-२० फर्म्याटमा हुने एसिया कपका लागि भारतले सूर्यकुमार यादवको कप्तानीमा टी-२० टोली घोषणा गरेको हो।
शुभमन गिललाई टी-२० टोलीमा फर्काइएको छ भने उपकप्तानको जिम्मेवारी समेत दिइएको छ। यसअघि भारतको टी-२० टोलीको उपकप्तान अक्षर पटेल थिए।
भारतीय टोलीको छनोट समितिले मंगलबार घोषणा गरेको १५ सदस्य टोलीमा अभिषेक शर्मा र सन्जु सामसनलाई ओपनरका रूपमा समावेश गरिएको छ। तर, गिललाई उपकप्तान बनाइएकाले उनी पनि ओपनिङका लागि प्रमुख दाबेदार हुन्।
टोलीको मध्यक्रम र तल्लो क्रममा सूर्युकमार, तिलक वर्मा, रिंकु सिंह र जितेश शर्मा छन्। यदि भारतले गिल र अभिषेकलाई ओपनिङ गराउने निर्णय गरेमा जितेश पहिलो रोजाइका विकेटकिपर हुन सक्छन्।
टोलीमा अक्षर, हार्दिक पाण्ड्या र शिवम दुबे गरी तीन जना अलराउन्डर छन्। विशेषज्ञ बलरमा जसप्रित बुमराह, अर्शदीप सिंह, कुलदीप यादव, वरुण चक्रवर्ती र हर्षित राना रहेका छन्।
वैकल्पिक खेलाडीमा परेका यशस्वी जैसवालले भने टोलीमा स्थान बनाउन सकेनन्। उनीसँगै प्रसिद्ध कृष्ण, वासिङ्टन सुन्दर, रियान पराग र ध्रुव जुरेल पनि वैकल्पिक खेलाडीको सूचीमा छन्।
आइपिएल २०२५ मा १७५ को स्ट्राइक रेटमा ६०४ रन बनाउँदै पञ्जाब किंग्सलाई फाइनलसम्म पुर्याएका श्रेयस अय्यरले पनि १५ सदस्यीय टोलीमा स्थान पाएनन्।
गिलले यसअघि जुलाई २०२४ मा श्रीलंकाविरुद्ध खेलेको टी-२० सिरिजमा उपकप्तान थिए। तर त्यसपछि भारतको टी-२० टोलीमा उनी थिएनन्। भारतले उनलाई एकदिवसीय र टेस्ट क्रिकेटमा प्राथमिकतामा राखेको थियो।
एसिया कपम भारत समूह 'ए' मा पाकिस्तान, ओमान र यूएईसँगै रहेको छ। भारतले आफ्नो पहिलो खेल सेप्टेम्बर १० मा दुबईमा यूएईविरुद्ध, दोस्रो खेल सेप्टेम्बर १४ मा दुबईमै पाकिस्तानविरुद्ध र तेस्रो खेल सेप्टेम्बर १९ मा अबु धाबीमा ओमानविरुद्ध खेल्नेछ।
एसिया कपका लागि भारतीय टोली
१. सूर्युकमार यादव (कप्तान)
२. शुभमन गिल (उपकप्तान)
३. हार्दिक पाण्ड्या
४. अर्शदीप सिंह
५. अभिषेक शर्मा
६. तिलक वर्मा
७. शिवम दुबे
८. अक्षर पटेल
९. जितेश शर्मा
१०. जसप्रित बुमराह
११. वरुण चक्रवर्ती
१२. कुलदीप यादव
१३. हर्षित राना
१४. रिंकु सिंह
१५. सन्जु सामसन
वैकल्पिक खेलाडी: प्रसिद्ध कृष्ण, वासिङ्टन सुन्दर, रियान पराग, ध्रुव जुरेल, यशस्वी जैसवाल।
-1746009348.jpg)
