क्यानडाका क्रिकेट टोलीका कप्तान निकोलस किर्टनलाई ठूलो मात्रामा प्रतिबन्धित पदार्थ बोकेको आरोपमा पक्राउ गरिएको छ।
उनी बार्बाडोसको ग्रान्टली एडम्स अन्तर्राष्ट्रिय विमानस्थलमा पक्राउ परेका हुन्। उनले ९ किलो गाँजा बोकेको आरोपमा पक्राउ गरिएको हो। प्रतिबन्धित पदार्थ बोकेपछि उनलाई प्रहरी हिरासतमा राखिएको छ।
उनी पक्राउ परेको कुरा क्रिकेट क्यानडाले बिहीबार पुष्टि गरेको छ। क्रिकेट क्यानडाले यो विषयलाई गम्भीर रूपमा लिएको बताएको छ।
किर्टन गत आइतबार एयर क्यानडाको उडानमा आफ्नो मातृभूमि पुगेपछि प्रहरीले पक्राउ गरेको थियो। विमानस्थलमा बरामद गरिएको गाँजाको सम्बन्धमा अनुसन्धानमा उनले अधिकारीहरूलाई सहयोग गरिरहेको बताइएको छ।
किर्टन वेस्ट इन्डिज र क्यानडा दुवैका लागि अन्तर्राष्ट्रिय क्रिकेट खेल्न योग्य छन् किनभने उनकी आमा क्यानेडियन हुन्।
ब्याटिङ अलराउन्डरले क्यानडाको राष्ट्रिय टोलीबाट वेस्ट इन्डिज अन्डर-१९ र बार्बाडोसका लागि खेलेका थिए।
उनलाई जुलाई २०२४ मा क्यानडाको कप्तान नियुक्त गरिएको थियो। अन्तिम पटक मार्च १५ मा नामिबियासँग १२ रनको हारमा क्यानडाको कप्तानी गरेका थिए।
उनले फेब्रुअरी २०१८ मा ओमान विरुद्ध खेल्दै क्यानडाको टोलीबाट अन्तर्राष्ट्रिय डेब्यू गरेका थिए। उनले हालसम्म क्यानडाका लागि २१ एकदिवसीय र २८ टी-२० खेल खेलेका छन्, जसमा सात अर्धशतक पनि समावेश छन्।
क्यानडाले अप्रिल १८ देखि बहामास, बर्मुडा, अमेरिका र केम्यान आइल्यान्डसँग उत्तरी अमेरिका कपमा खेल्ने तयारी गरेको छ, यद्यपी किर्टोनको पक्राउले उनको सहभागिता अनिश्चित बनेको छ।
उनले क्यारिबियन प्रिमियर लिगमा जमैका तल्लावाह र क्यानडामा ग्लोबल टी-२० मा मोन्ट्रियल टाइगर्स र टोरन्टो नेशनल्सको प्रतिनिधित्व पनि गरिसकेका छन्।
उनले गत मंसिरमा भएको नेपाल प्रिमियर लिग समेत खेलेका थिए। उनी विराटनगर किंग्समा आबद्ध थिए।
