चैत २७ देखि हङकङमा हुने चार देशीय अन्तर्राष्ट्रिय टी-२० सिरिजमा प्रशिक्षक रूपमा ज्ञानेन्द्र मल्लले नेपाली टोलीलाई प्रशिक्षक गराइरहेका छन्।
उनले बुधबारदेखि रूपन्देहीमा नेपाली टोलीको प्रशिक्षण गराइरहेका हुन्।
यसअघि गत चैत १५ मा नेपाल क्रिकेट संघ (क्यान) ले राष्ट्रिय पुरूष क्रिकेट टोलीको प्रशिक्षकमा अस्ट्रेलियाका स्टुअर्ट ललाई नियुक्त गरेको थियो।
प्रशिक्षक ल नेपाल आउन ढिलाइ भएपछि क्यानले मल्ललाई प्रशिक्षकको जिम्मेवारी दिएको छ। यसअघि ज्ञानेन्द्र हङकङ सुपर सिक्सेसमा नेपाली टोलीको प्रशिक्षक थिए। मल्लले नेपालको ‘ए’ टोलीको प्रशिक्षक भएर पनि काम गरेका थिए।
रूपन्देहीको भैरहवामा प्रशिक्षण सुरू गरेपछि प्रशिक्षक मल्लले सिरिज जित्ने लक्ष्य रहेको बताएका छन्। उनले एकजुट भएर सबै नेपाललाई खुशी तुल्याउने गरी खेलाडीहरुले खेल प्रदर्शन गर्ने विश्वास व्यक्त गरे।
कप्तान रोहितकुमार पौडेलले भर्खरै प्रधानमन्त्री कप सम्पन्न भएको र त्यसबाट धेरै खेलाडीहरूको राम्रो अभ्यास समेत भएकाले आफूहरूले जति सक्दो राम्रो खेल्ने बताए।
सिरिजमा नेपाल र हङकङसहित कुवेत र कतारले प्रतिस्पर्धा गर्नेछन्।
नेपालले पहिलो खेल चैत २७ गते कतारसँग, चैत २८ गते कुवेतसँग र चैत ३० गते हङकङसँग खेल्नेछ। चैत ३१ गते तेस्रो स्थान र फाइनल खेल हुनेछ।
नेपाली टोली
रोहित पौडेल (कप्तान), कुशल भुर्तेल, आसिफ शेख, किरण ठगुन्ना, लोकेश बम,बसिर अहमद, दिपेन्द्रसिंह ऐरी, ललित राजवंशी, सोमपाल कामी, करण केसी, सन्दीप जोरा, नन्दन यादव, रिजन ढकाल, गुलशन झा, अर्जुन घर्ती, कुशल मल्ल, रुपेश सिंह, दिपेन्द्र रावत, शाहब आलम, बिबेक यादव
