भैरहवामा नेपाली राष्ट्रिय क्रिकेट टोलीको बन्द प्रशिक्षण सुरु भएको छ।
आगामी हप्तादेखि हङकङमा हुने चारदेशिय टी–२० सिरिजका लागि रुपन्देहीको भैरहवास्थित सिद्धार्थ क्रिकेट मैदानमा बुधबारदेखि बन्द प्रशिक्षण सुरु भएको हो।
रोहितकुमार पौडेलको कप्तानीमा रहेको राष्ट्रिय क्रिकेट टिमलाई नेपाली टिमका प्रशिक्षक ज्ञानेन्द्र मल्लले प्रशिक्षण दइरहेका छन्। भैरहवामा राष्ट्रिय टिमको प्रशिक्षण भएको यो पहिलो पटक हो।
बन्द प्रशिक्षणमा आएका खेलाडीहरुलाई रुपन्देही क्रिकेट संघले स्वागत गरेको थियो। संघका अध्यक्ष हरिबहादुर थापाले खानपिन र अनुशासनमा रहेर खेले अहिलेको राष्ट्रिय टिमका सदस्यहरुले अझै १० वर्ष खेल्ने विश्वास व्यक्त गरे।
उनले बन्द प्रशिक्षणमा रहँदा अनुशासित भएर बस्न र राष्ट्रको शिर उँचो गराउने गरी खेल खेल्न आग्रह गरे।
‘तपाईंहरु राष्ट्रका गहना हो’, ‘त्यसैले तपाईंहरुले सफलता पाउँदा होस् वा नपाउँदा होस् सबै नेपालीहरु साथमा छन्। यसपटक सफलता हात पर्नेमा हामी विश्वस्त छौं,’ थापाले भने।
रुपन्देहीका प्रमुख जिल्ला अधिकारी बासुदेव घिमिरेले नेपालको क्रिकेटले पछिल्लो समय गरेको प्रगती सबै नेपालीले गर्व गर्न लायक रहेको भन्दै राष्ट्रभक्ती र राष्ट्रियतालाई आत्मसाथ गरेर प्रतिष्पर्धामा सहभागि हुन आग्रह गरे। ‘तपाईंहरु मैदानमा खेलिरहँदा गर्वले हाम्रो छाती चौडा हुन्छ, छाती ढुकढुक हुन्छ, हाम्रा खेलाडीले जिते हुन्थ्यो भन्ने हुन्छ’, उनले भने, ‘त्यसैले सधै मेहनत गर्नुस्, राष्ट्रप्रेम यहाँहरुलाई थाहा छ, क्रिकेटको महत्व बुझ्नु भएकै छ।’ उनले हङकङको सिरिज जितेर आउन शुभकामना दिए।
प्रशिक्षक ज्ञानेन्द्र मल्लले हङकङमा हुने सिरिज यसपटक नेपाल ल्याउने लक्ष्य रहेको जनाए। उनले टिम एकजुट भएर सबै नेपाललाई एकै ठाउँमा बाँधी खुशी तुल्याउने गरी खेलाडीहरुले खेल प्रदर्शन गर्ने विश्वास व्यक्त गरे।
राष्ट्रिय टिमका कप्तान रोहितकुमार पौडेलले टिमले एकजुट भएर राम्रो प्रदर्शन गरी सिरिज जित्ने लक्ष्य राखेको बताए। उनले भर्खरै प्रधानमन्त्री कप सम्पन्न भएको र त्यसबाट धेरै खेलाडीहरुको अभ्यास समेत भएकाले आफूहरुले जति सक्दो राम्रो गर्ने बताए।
नेपाल क्रिकेट संघ (क्यान) को छनोटमा परेका २० जना खेलाडीहरु बन्द प्रशिक्षणमा सहभागी छन्। हङकङमा हुने चारदेशिय सिरिजपछि नेपाटी टिम आगामी जुनमा स्कटल्याण्डमा घरेलु टोली र नेदरल्याण्ड्ससँग लिग टु को चौथो सिरिज खेल्नेछ।
बन्द प्रशिक्षणमा रहेका खेलाडीहरुमा रोहितकुमार पौडेल, कुशल भूर्तेल, आशिफ शेख, किरणकुमार ठगुन्ना, लोकेश बम, बसिर अहम्मद, दीपेन्द्रसिंह ऐरी, ललितनारायण राजवंशी, सोमपाल कामी, करण केसी, कमलसिंह ऐरी, नन्दन यादव, रिजन ढकाल, गुलशनकुमार झा, अर्जुन घर्ती, कुशल मल्ल, रुपेश सिंह, दीपेन्द्र रावत, शाहब आलम र विवेक यादव छन्।
