इण्डियन प्रिमियर लिग (आइपिएल)मा राजस्थान रोयल्सले पहिलो जित निकालेको छ। गएराति जारी सिजनको तेस्रो खेल खेल्दा राजस्थानले पहिलो जित निकालेको हो।
पहिलो जित निकाल्दा उसले चेन्नई सुपर किंग्सलाई ६ रनले पराजित गर्यो।
राजस्थानले दिएको १८२ रनको लक्ष्य पछ्याएको चेन्नईले ६ विकेट गुमाएर १७६ रन मात्रै बनाउन सक्यो।
त्यस क्रममा कप्तान ऋतुराज गायकवाडले सर्वाधिक ६३ रन बनाए। उनले ४४ बलमा ७ चौका र १ छक्का हाने।
रविन्द्र जडेजाले नट आउट ३२ रन बनाए। ओपनर राहुल त्रिपाठीले १९ बलमा ३ चौका र १ छक्का हानेर २३ रन बनाए।
शिवम् दुबेले १८, विजय शंकरले ९ र जेमी ओभरटनले ११ रन जोडे। महेन्द्रसिंह धोनी ११ बल खेलेर १६ रन बनाउँदै आउट भए।
बलिङतर्फ राजस्थानका वानिडु हसरंगाले ४ विकेट लिए। त्यस्तै जोफ्रा आर्चर र सन्दीप शर्माले एक/एक विकेट लिए।
पहिले ब्याटिङ गरेको राजस्थानले ९ विकेट गुमाएर १८२ रन बनाएको थियो।
राजस्थानका लागि नितिश रानाले सर्वाधिक ८१ रन बनाए। उनले ३६ बलमा १० चौका र ५ छक्का हाने।
कप्तान रियान परागले २८ बलमा २ चौका र २ छक्का प्रहार गर्दै ३७ रन बनाए। सन्जु शामसनले २० र सिमरोन हेटमायरले १९ रन जोडे।
बलिङतर्फ चेन्नईका खलिल अहमद, नूर अहमद र मथिशा पाथिरनाले २/२ विकेट लिँदा रविचन्द्रन आश्विन र रविन्द्र जडेजाले १/१ विकेट लिए।
पहिलो खेलमा मुम्बई इन्डियन्सलाई पराजित गरेको चेन्नई दोस्रो खेलमा रोयल च्यालेन्जर्स बेंग्लुरूसँग पराजित भएको थियो।
राजस्थान भने यसअघि सनराइजर्स हैदरावाद र कोलकाता नाइट राइडर्ससँग पराजित भएको थियो।
आज मुम्बई इण्डियन्स र कोलकाता नाइट राइडर्सबीच खेल हुनेछ।
