प्रधानमन्त्री कप एकदिवसीय राष्ट्रिय क्रिकेट प्रतियोगितामा सशस्त्र प्रहरी बलको एपिएफ क्लबले आफ्नो फाइनल सम्भावना जीवित राखेको छ।
बुधबार रुपन्देहीको सिद्धार्थनगरमा भएको खेलमा एपिएफले अंक तालिकाको पुछारमा रहेको कोशी प्रदेशलाई २ विकेटले पराजित गर्दै फाइनल सम्भावना जीवित राखेको हो।
अंक तालिकाको तेस्रो स्थानमा रहेको एपिएफले लिग चरणका सबै खेल्दा १४ अंक जोडेको छ। एक खेल कम खेलेको दोस्रो स्थानको त्रिभुवन आर्मी क्लबको पनि १४ अंक छ। रनरेटमा आर्मी अघि छ। अन्तिम खेलअघि १६ अंक जोडेको शीर्ष स्थानको नेपाल पुलिस क्लब भने फाइनलमा पुगिसकेको छ।
अब पुलिस र आर्मीबीच भोलि एक्स्ट्राटेक ओभलमा हुने लिगको अन्तिम खेलपछि फाइनलमा पुग्ने दोस्रो टोलीको टुंगो लाग्नेछ। आर्मी फराकिलो अन्तरले पराजित भएमा एपिएफको सम्भावना हुनेछ। यद्यपी आर्मी झिनो अन्तरको हारले पनि फाइनलमा पुग्ने सम्भावना छ।
बुधबार एपिएफको फाइनल सम्भावना जीवित राख्न लोकेश बमले उत्कृष्ट ब्याटिङ गरे। उनले नटआउट ८४ रन जोडेपछि एपिएफले कोशीले दिएको २५५ रनको लक्ष्य ४४.४ ओभरमा ८ विकेट गुमाएर पूरा गर्यो। लोकेशले दबाबपूर्ण अवस्थामा ५४ बल खेलेर ६ चौका र ६ छक्का प्रहार गरे। इर्शाद अहमदले नटआउट १६ रन जोडे।
एपिएफका लगि कप्तान रोहित पौडेलले जोडेको ६१ रन पनि महत्वपूर्ण सावित भयो। ओपनरद्वय आयुष्मान बम शून्य र आसिफ शेख ५ रनमा आउट भएपछि एपिएफ सुरुमै दबाब परेको थियो। त्यसपछि कप्तान रोहित अर्धशतक र दीपक बोहराले ३६ रन बनाए।
बलिङमा कोशीका फिर्दोस अन्सारी र दिपेश कँडेलले ३-३ विकेट लिए।
त्यसअघि टस जितेर पहिले ब्याटिङ गरेको कोशीले शकिब हकको ६८, आइस भट्टराईको ३४, सुजन थपलियाको ३३ र कप्तान अंकित सुवेदीको ३५ रनको मद्दतमा २५४ रन जोड्यो।
अन्तिम बलमा अलआउट भएको कोशीविरूद्ध एपिएफका अभिषेक गौतम र मौसम ढकालले ३-३ विकेट लिए। कप्तान रोहित पौडेलको नाममा २ विकेट रह्यो।
कोशीले प्रधानमन्त्री कपमा ९ खेल खेल्दा केवल १ खेलमा मात्र जित निकाल्न सफल भयो भने अंक तालिकाको पुछारमा रह्यो।
-1742985150.jpg)
