पाकिस्तान सुपर लिग (पिएसएल) छाडेर इन्डियन प्रिमियर लिग (आइपिएल) टिममा आबद्ध भएका दक्षिण अफ्रिकाका अलराउन्डर कोर्बिन बोसमाथि कानुनी नोटिस जारी भएको छ।
पाकिस्तान क्रिकेट बोर्ड (पिसिबी) ले कोर्बिनमाथि कानुनी नोटिस जारी गर्ने निर्णय गरेको हो। उनलाई पिएसएल टोलीसँगको सम्झौताअनुसारको दायित्व पूरा नगरेको आरोप लगाइएको छ।
सिजन २०२५ को पिएसएल र आइपिएल एकै समयमा हुँदैछ। आइपिएल मार्च २२ देखि मे २५ सम्म हुँदैछ भने पिएसएल अप्रिल ११ देखि मे १८ सम्म हुँदैछ।
त्यसअघि गत जनावरीमा पिएसएलको ड्राफ्ट भएको थियो। उक्त ड्राफ्टमार्फत् दक्षिण अफ्रिकाका अलराउन्डर कोर्बिन बोसलाई पिएसएल टिम पेशावर जल्मीले डायमन्ड श्रेणीबाट भित्र्याएको थियो।
तर गत मार्च ८ मा उनी आइपिएल टोली मुम्बई इन्डियन्समा आबद्ध भएको सार्वजनिक भएको थियो। उनलाई मुम्बईले लिजाद विलियम्स घाइते भएपछि उनको स्थानमा टोलीमा भित्र्याएको घोषणा गरेको थियो।
यसरी पिएसएल छाडेर आइपिएल आएपछि पिएसएलका फ्रेञ्चाइज टोलीहरुले चिन्ता प्रकट गरेका थिए। भविष्यमा पिएसएल छाडेर आइपिएल आउने क्रम रोकियोस् भनेर बोसविरूद्ध पिसिबीले नोटिस जारी गरेको बतााइएको छ। उनलाई नोटिस जारी गर्नुअघि एक लिग छाडेर अर्को लिग जाने खेलाडीलाई पूर्ण प्रतिबन्ध लगाउने विषयमा टिमहरुबीच अनौपचारिक छलफल भएको छ।
पिसिबीको एक विज्ञप्तिमा भनिएको छ, ‘कानुनी नोटिस उनको एजेन्टमार्फत पठाइएको थियो। उनको व्यावसायिक र सम्झौता प्रतिबद्धताहरूबाट पछि हट्ने कार्यको औचित्यबारे जवाफ दिन भनिएको छ। निर्धारित समय सीमाभित्र उनको प्रतिक्रियाको अपेक्षा गरिएको छ। पीसीबीले यस विषयमा थप कुनै टिप्पणी गर्ने छैन।’
-1742801159.jpg)
