प्रधानमन्त्री कप एकदिवसीय क्रिकेट प्रतियोगितामा बागमती प्रदेशको खराब प्रदर्शन जारी छ।
अंक तालिकामा पुछारबाट दोस्रो स्थानमा रहेको बागमतीले चार खेलमा तेस्रो हार ब्यहोर्ने क्रममा आइतबार दाङको लमहीमा लुम्बिनी प्रदेशसँग ४८ रनको पराजय भोग्यो। लुम्बिनीले भने आफ्ना चार मध्ये तीन खेलमा जित निकालिसकेको छ।
लमहीमा टस जितेर पहिले ब्याटिङ गरेको घरेलु टोली लुम्बिनी ३२.४ ओभरमा ११५ रनमा अलआउट भयो। लुम्बिनीका लागि आकाश त्रिपाठीले सबैभन्दा बढी ३३ रन बनाए। मनिस थापा र कप्तान देव खनालले १५-१५ रन बनाउँदा अरु ब्याटरले दोहोरो अंकमा रन बनाउन सकेनन्।
बलिङमा बागमतीका गौतम केसीले ४ विकेट लिए। सूर्य तामाङ र इशान पाण्डेले २-२ हात पारे।
११६ रनको सामान्य लक्ष्य भए पनि बागमती २२.५ ओभरमा ६७ रनमै अलआउट भयो। बामगतीका लागि कप्तान पृथु बाँस्कोटाले सबैभन्दा बढी १५ रन बनाए।
अरु ब्याटरले उल्लेख्य रन बनाउन सकेनन्। बलिङमा लुम्बिनीका अजय चौहान र बिप्रसोन केसीले ३-३ विकेट लिए। निर्मल गुरुङ र रमेश कुर्मीको नाममा २-२ विकेट रह्यो।
