ओपनर तृतराज दासको शतकमा त्रिभुवन आर्मी क्लबले प्रधानमन्त्री कप पुरुष एकदिवसीय राष्ट्रिय क्रिकेट प्रतियोगितामा लगातार चौथो जित निकालेको छ। आर्मीले शनिबार भैरहवास्थित सिद्धार्थ क्रिकेट मैदानमा भएको खेलमा कोशी प्रदेशलाई ७ विकेटले हराएको हो।
२३१ रनको लक्ष्य आर्मीले ४७.१ ओभरमा ३ विकेट गुमाएर पूरा गर्यो। आर्मीको जितमा ओपनर तृतराज दासले नटआउट रहँदै सर्वाधिक ११२ रन जोडे। यस्तै, बसिर अहमदले अविजित ६१ र विनोद भण्डारीले २७ रन बनाए।
कोशीका लागि प्रकाश कार्की, सन्दीप ढुगांना र भुपाल लुईंटेलले समान १–१ विकेट लिए।
त्यसअघि टस जितेर पहिले ब्याटिङ गर्दै कोशीले ४९.३ ओभरमा २३० रन बनाएको थियो। कोशीका लागि सुभान गहतराजले सर्वाधिक ५१ रन जोडे।
यस्तै, सोनु अन्सारीले ४४ र सुजन थपलियाले ४२ रन जोडे। आर्मीका लागि सोमपाल कामीले ४, शाहब आलम र आकाश चन्दले समान २–२ तथा कुशल मल्लले १ विकेट लिए।
आर्मी खेलेका ४ खेलमा अपराजित रहँदै ८ अंकमा रहेको छ। खेलेका सबै चारै खेलमा पराजित भएको कोशी अंक तालिकाको पुछारमा छ।
यस्तै, शनिबार नै दाङको लमहीस्थित देउखुरी क्रिकेट मैदानमा भएको खेलमा साविक विजेता नेपाल पुलिस क्लबले आफ्नो जितको यात्रालाई निरन्तरता दियो।
लगातार चौथो जित निकाल्ने क्रममा पुलिसले मधेस प्रदेशलाई १९३ रनले हरायो। टस जितेर ब्याटिङ गरेको पुलिसले ४९.५ ओभरमा २८८ रन बनाएको थियो।
पुलिसका लागि कप्तान दीपेन्द्रसिंह ऐरीले ६३, आरिफ शेखले ५५, अर्जुन साउदले ४७, दीलिप नाथले ४५ र शंकर रानाले २७ रन बनाए।
मधेसका रुपेश सिंहले ४, विशाल पटेलले ३, कमल गुप्ताले २ तथा रञ्जित कुमारले १ विकेट लिए।
२८९ रनको विशाल लक्ष्य पछ्याएको मधेस २६.१ ओभरमा सबै विकेट गुमाएर ९५ रनमा समेटिएको थियो। मधेसका लागि दिपेश दासले सर्वाधिक ३१ र रुपेश सिंहले १६ रन बनाए।
पुलिसका लागि ललितनारायण राजवंशीले ९.१ ओभरमा २८ रन खर्चिएर ४ विकेट लिए । कुशल भुर्तेलले २ तथा करण केसी, सागर ढकाल र कप्तान दीपेन्द्रसिंह ऐरीले समान १–१ विकेट लिए।
जितसँगै पुलिस अंक तालिकाको पहिलो स्थानमा उक्लिएको छ । पराजित मधेसले ३ खेलबाट २ अंक जोडेको छ।
