प्रधानमन्त्री कप एकदिवसीय राष्ट्रिय क्रिकेट प्रतियोगितामा बागमती प्रदेशले पहिलो जित दर्ता गरेको छ।
यसअघिका लगातार दुई खेलमा पराजित भएको बागमतीले शुक्रबार रूपन्देहीको एक्स्ट्राटेक ओभलमा भएको खेलमा सुदूरपश्चिम प्रदेशलाई ५५ रनले पराजित गर्यो। सुदूरपश्चिमको भने यो चार खेलमा तेस्रो हार हो।
बागमतीले दिएको २६७ रनको लक्ष्य पछ्याएको सुदूरपश्चिम ४७ ओभरमा २११ रनमा अलआउट भयो।
सुदूरका लागि ओपनर टेक रावतले ४५ रन र कप्तान नारायण जोशीले ३९ रन जोड्न सके।
बलिङमा बागमतीका रिजन ढकाल र सोनु देवकोटाले ४-४ विकेट लिन सफल भए।
शुक्रबार टस जितेर पहिले ब्याटिङ गरेको बागमतीले ८ विकेटको क्षतिमा २६६ रन बनायो। बागमतीका लागि शुभ कंसाकारले ६८ बलमा ५ चौका र ४ छक्काको मद्दतमा ७७ रन बनाए। ओपनर आशुतोष घिरैयाले ५८ रनको योगदान गरे। इशान पाण्डेले ३६ रन जोडे।
बलिङमा सुदूरपश्चिमका हेमन्त धामी, शेर मल्ल र सूर्य श्रेष्ठले २-२ विकेट लिन सफल भए।
