प्रधानमन्त्री कप एकदिवसीय राष्ट्रिय क्रिकेट प्रतियोगितामा नेपाल पुलिस क्लबले लगातार दोस्रो खेलमा जित निकालेको छ।
बुधबार रूपन्देहीको एक्स्ट्राटेक ओभलमा भएको खेलमा पुलिसले कोशी प्रदेशलाई १५४ रनले पराजित गर्यो। कोशी जारी प्रतियोगितामा लगातार तेस्रो खेलमा पराजित भइसकेको छ।
टस जितेर पहिले ब्याटिङ गरेको पुलिसले ८ विकेटको क्षतिमा २८८ रन बनायो। पुलिसका लागि ओपनिङ ब्याटर कुशल भुर्तेलले ६५ रन र दिलीप नाथले ६१ रनको योगदान गरे। अर्जुन साउद र रशिद खानले ३८-३८ रन बनाए।
बलिङमा कोशी प्रदेशका भुपाल लुइटेलले ३ विकेट र प्रकास कार्कीले २ विकेट लिए।
२८९ रनको लक्ष्य पछ्याएको कोशी ३६.२ ओभरमा १३४ रनमा अलआउट भयो। कोशीका लागि सुजन थपलियाले सबैभन्दा बढी नटआउट ३३ रन बनाए।
बलिङमा पुलिसका करण केसीले ३ विकेट लिए भने ललित राजवंशी र कुलश भुर्तेलले २-२ विकेट हात सफल भए। सागर ढकाल, कप्तान दीपेन्द्रसिंह ऐरी र गुल्सन झाको नाममा १-१ विकेट आ-आफ्नो नाममा लेखाए।
