पछिल्लो दुई वर्षमा भारतले सीमित ओभरको क्रिकेटमा उत्कृष्ट प्रदर्शन गरिरहेको छ। पछिल्ला तीन आइसिसी प्रतियोगितामा भारतले तीनैमा फाइनलमा स्थान बनाएको छ भने दुई प्रतियोगिताको उपाधि जितेको छ। तीन प्रतियोगितामा २४ खेल खेल्दा भारतले २३ जित निकालेको छ।
सन् २०२३ को एकदिवसीय फाइनल खेलेको भारतले सन् २०२४ को टी-२० विश्वकप जितेको थियो। आइतबार च्याम्पियन्स ट्रफीको फाइनलमा न्युजिल्यन्डलाई ४ विकेटले पराजित गरेसँगै भारतले विश्व क्रिकेटमा आफ्नो सर्वोच्चता कामय गर्यो।
सन् २०२३ को एकदिवसीय विश्वकपमा फाइनलअघि भारतले सबै खेल जितेको थियो। फाइनलमा अस्ट्रेलियासँग भारत पराजित भएको थियो।
सन् २०२४ को टी-२० विश्वकप र २०२५ को च्याम्पियन्स ट्रफीमा त भारत अपराजित रहदै च्याम्पियन बन्यो।
तीन वटै प्रतियोगिताको कप्तानी रोहित शर्माले गरे। पछिल्लो दुई वर्षमा भारतको युवा र अनुभवी खेलाडी सम्मिलित टोलीलाई रोहितले सही नेतृत्व गर्न सफल भए।
च्याम्पियन्स ट्रफीमा भारतले बंगलादेश, पाकिस्तान र न्युजिल्यान्डलाई हराउँदै समूह विजेता बनेर सेमिफाइनलमा स्थन पक्का गरेको थियो। सेमिफाइनलमा अस्ट्रेलिया र फाइनलमा न्युजिल्यान्डलाई हराएसँगै भारत च्याम्पियन बन्यो।
आइसिसी टी-२० विश्वकप २०२४ मा भारतले आयरल्यान्ड, पाकिस्तान, युएई, अफगानिस्तान, बंगलादेश, अस्ट्रेलिया र इंग्ल्यान्डलाई हराएको थियो। फाइनलमा दक्षिण अफ्रिकालाई हराउँदै भारत विश्वविजेता बन्यो।
एकदिवसीय विश्वकप २०२३ मा भारतले लिगमा लगातार नौ जित हात पारेको थियो। सेमिफाइनलमा न्युजिल्यान्डलाई हराएसँगै भारत फाइनलमा पुग्यो। फाइनलमा भने अस्ट्रेलियासँग हार्दा उपाधि विमुख बन्यो।
