आइसिसी च्याम्पियन्स ट्रफी २०२५ को उपाधिका लागि आज भारत र न्युजिल्यान्ड प्रतिस्पर्धा गर्दैछन्। युएईको दुबईमा नेपाली समयअनुसार दिउँसो पौने तीन बजे खेल सुरु हुँदैछ।
यस प्रतियोगितामा भारत अपराजित छ। समूह चरणमा भारतले न्युजिल्यान्डलाई पराजित गर्दै विजेता बनेर अन्तिम चारमा पुगेको थियो। यस्तै पछिल्ला पाँच एकदिवसिय खेलमा भारतले न्युजिल्यान्डसँग निरन्तर जित निकालेको छ।
तर रेकर्डले न्युजिल्यान्डको सामना गर्नु भारतको लागि ठूलो चुनौती साबित हुन सक्ने देखाएको छ।
२५ वर्षअघि सन् २००० मा च्याम्पियन्स ट्रफीको फाइनलमा न्युजिल्यान्ड र भारतबीच भिडन्त भएको थियो। एकदमै रोमाञ्चक खेलमा २६५ रनको लक्ष्य पछ्याउँदै न्युजिल्यान्डले भारतलाई दुई बल बाँकी रहँदा चार विकेटले पराजित गरेको थियो।
सीमित ओभरको खेलमा न्युजिल्यान्डको सो एक मात्र उपाधि हो।
भारतले सन् २००० मा च्याम्पियन्स ट्रफीको फाइनलमा न्युजिल्यान्डसँग हारे पनि त्यसपछि पाँच पटक सीमित ओभरको प्रतियोगिताको उपाधि जितेको छ। यसमा दुई पटक च्याम्पियन्स ट्रफी पनि सामवेश छन्।
न्युजिल्यान्डले उपाधि जित्न नसके पनि आइसिसी प्रतियोगितामा प्रदर्शन निरन्तर राम्रो रहेको छ।
सन् २००७ देखि २०२३ सम्ममा न्युजिल्यान्डले हरेक पटक एकदिवसीय विश्वकपको सेमिफाइनल वा फाइनल खेलेको छ।
भारत र न्युजिल्यान्ड सीमित ओभर ढाँचाको आइसिसी प्रतियोगितामा १६ पटक आमनेसामने भएका छन्।
भारत ६ पटक विजयी भएको छ भने न्युजिल्यान्ड ९ पटक सफल भएको छ। दुई टोली बीचको एउटा खेलमा भने नजिता आएको छैन।
न्युजिल्यान्डले तेस्रो पटक आइसिसी च्याम्पियन्सको फाइनल खेल्दैछ। न्युजिल्यान्डको तुलनामा भारतीय टोलीसँग फाइनल खेल्ने अनुभव बढी छ। भारतीय टोलीले मार्च ९ मा पाँचौं पटक आइसीसी च्याम्पियन्स ट्रफीको फाइनल खेल्नेछ।
भारत र न्युजिल्यान्ड पछिल्लो ६ वर्षमा आइसिसी एकदिवसीय विश्वकपको सेमिफाइनलमा दुई पटक आमनेसामने भएका छन्। २०१९ को विश्वकप सेमिफाइनलमा न्युजिल्यान्डले भारतलाई १८ रनले पराजित गरेको थियो। २०२३ को एकदिवसीय विश्वकप सेमिफाइनलमा भारतले ७० रनले जितेर आफ्नो अघिल्लो हारको बदला लिएको थियो।
२०२५ को च्याम्पियन्स ट्रफीमा भारत र न्युजिल्यान्डका टोली एउटै समूहमा थिए। यस प्रतियोगितामा न्युजिल्यान्डका बलरहरूले भारतीय ब्याट्सम्यानहरूलाई सबैभन्दा बढी समस्यामा पारे।
भारतीय टोलीले ५० ओभरमा ९ विकेट गुमाउँदै २४९ रन मात्र बनाउन सक्यो। श्रेयस अय्यर बाहेक यस खेलमा अन्य कुनै पनि भारतीय ब्याट्सम्यानले अर्धशतक पनि बनाउन सकेनन्। म्याट हेनरी यस खेलमा भारतको लागि सबैभन्दा ठूलो चुनौती साबित भए। हेनरीले पाँच विकेट लिए।
यद्यपी आफ्ना स्पिनरहरूको सहयोगमा भारतीय टोलीले न्युजिल्यान्डलाई ४४ रनले हराउन सफल भयो।
