इण्डियन प्रिमियर लिग (आइपिएल)का संस्थापक ललित मोदीले भारतीय नागरिकता त्याग्नका लागि निवेदन दिएका छन्।
हिन्दुस्तान टाइम्सका अनुसार मोदीले लन्डनस्थित भारतीय उच्च आयोगमा नागरिकता त्यागको निवेदन दिएका हुन्।
भारतीय विदेशमन्त्रालयका प्रवक्ता रणधीर जयसवालले मोदीले नागरिकता त्यागका लागि निवेदन दिएको पुष्टी गरेका छन्।
जयसवालले मोदीले दक्षिण प्रशान्त टापु राष्ट्र भानुआटुको नागरिकता लिइसकेको पनि बताएका छन्।
यस विषयमा थप जाँच भइरहेको भारतीय विदेश मन्त्रालयले जनाएको छ।
मोदी भारतीय क्रिकेट कन्ट्रोल बोर्डका उपाध्यक्षसमेत भइसकेका व्यक्ति हुन्। उनीमाथि धोखाधडी, मनी लाउन्डरिङ र विदेशी मुद्रा व्यवस्थापन ऐनको उल्लंघन गरेको आरोप छ।
भारतीय विदेश मन्त्रालयका प्रवक्ता जयसवालले मोदीविरूद्धको मुद्दा निरन्तर अघि बढिरहेको बताएका छन् ।
'त्यसबारे विद्यमान नियम र प्रक्रियाहरूको आधारमा जाँच गरिनेछ। हामी कानुनअनुसार आवश्यक पर्नेगरी उनीविरूद्धको मुद्दालाई निरन्तर अगाडि बढाइरहेका छौं,' जयसवालले भनेका छन्।
मोदीका वकिल महमुद आब्दीले भारतीय संयन्त्रहरूले कुनैपनि अदालतमा मोदीविरूद्ध आरोपपत्र दायर नगरेको बताएका छन्।
मोदी २०१० मा बिसिसीआईबाट निलम्बित भएपछि लण्डन बस्दै आएका छन्।
बिसिसीआइले आइपिएल गभर्निङ काउन्सिलको अध्यक्षको रूपमा काम गर्दा मोदीले वर्ल्ड स्पोर्ट्स ग्रुपका अधिकारीहरूसँग मिलेर ७५३ करोड ठगी गरेको आरोप लगाएको छ।
