आइसिसी च्याम्पियन्स ट्रफीको फाइनल पुग्न न्युजिल्यान्डले दुई ब्याटरको शतकमा दक्षिण अफ्रिकालाई ३६३ रनको विशाल लक्ष्य दिएको छ।
पाकिस्तानको लाहोरमा भएको दोस्रो सेमिफाइनलमा टस जितेर पहिले ब्याटिङ गरेको न्युजिल्यान्डले ६ विकेटको क्षतिमा ३६२ रन जोड्यो।
न्युजिल्यान्डका लागि रचिन रविन्द्र र केन विलियमसनले शतक प्रहार गरे। ओपनिङ ब्याटर रचिनले १०१ बलमा १३ चौका र १ छक्काको मद्दतमा १०८ रन बनाए।
विलियमसनले ९४ बलमा १० चौका र २ छक्का प्रहार गर्दै १०२ रन बनाए।
ड्यारेल मिचेलले ३७ बलमा ४९ रन र ग्लेन फिलिप्सले २७ बलमा नटआउट ४९ रन जोडे पनि न्युजिल्यान्डले विशाल योगफल तयार गर्यो।
बलिङमा दक्षिण अफ्रिकाका लुंगी एनगिडीले ३ विकेट लिए भने कागिसो रबडाले २ विकेट हात पारे।
यो खेलको विजेताले आगामी आइतबार दुबईमा भारतसँग उपाधिका लागि प्रतिस्पर्धा गर्नेछ।
