नेपाली महिला क्रिकेट टोलीले शनिबारदेखि युगान्डमा हुने वमुन्स डे क्रिकेट प्रतियोगितामा भाग लिँदैछ।
त्यसका लागि नेपाली टोलीलाई नेपाल क्रिकेट संघ (क्यान) ले बुधबार विदाइ गर्यो।
युगान्डा जानुअघि नेपाली टोलीका प्रशिक्षक मनोज कटुवालले यसअघि घरेलु मैदानमा भएको थाइल्यान्ड र नेदरल्यान्ड्सविरूद्धको सिरिजपछि टोलीमा निकै सुधार गरेको बताएका छन्।
उनले टोलीको फिटनेस र फिल्डिङमा सुधार आएको दाबी गरे। साथै भेरियसनमा बलिङ गर्नका लागि टोलीमा काम गरेको उनको भनाइ छ। पावरप्ले र पछिल्ला ओभरमा राम्रो ब्याटिङ गर्नका लागि अभ्यास गरेको प्रशिक्षक कटुवालले बताए।
नेपालले पछिल्लो समय भारतकी फिटनेस ट्रेनर मोनिकालाई टोलीमा भित्र्याएको थियो। उनको आगामन पछि टोलीको फिटनेसमा निधै सुधार आएको दाबी गरिएको छ।
नेपाल र घरेलु टोली युगान्डासहित नामिबिया तथा हङकङ गरी चार टोलीबीच प्रतियोगितामा प्रतिस्पर्धा हुनेछ। यो प्रतियोगितालाई नेपालले टी-२० विश्वकप एसिया छनोटको तयारीको रूपमा लिएको प्रशिक्षक कटुवालले बताए।
युगान्डामा नेपालले ८ मार्चमा नामिबियासँग पहिलो खेल खेल्नेछ। यस्तै आयोजक युगान्डासँग ९ मार्च र हङकङसँग १० मार्चमा खेल हुनेछ।
नेपालले मे २०२५ मा थाइल्यान्डमा हुने एसिया छनोट खेल्ने तय छ। एसिया छनोटका शीर्ष दुई टोली विश्व छनोटमा पुग्नेछन्। विश्वकप छनोटमा १० टोली भिड्नेछन्। १० मध्ये चार टोली सन् २०२६ मा इंग्ल्यान्डमा हुने आइसिसी महिला टी-२० विश्वकपमा छनोट हुनेछन्।
युगान्डा भ्रमणमा लागि दुई खेलाडी पहिलो पटक राष्ट्रिय टोलीमा परेका छन्। रिया शर्मा र सना प्रवीनले पहिलो पटक राष्ट्रिय टोलीमा स्थान बनाएका हुन्।
नेपाली टोली
इन्दु बर्मा (कप्तान), बिन्दु रावल, रिया शर्मा, सम्झना खड्का, ममता चौधरी, पूजा महतो, राजमती ऐरी, कविता जोशी, रुबिना छेत्री, अलिशा कुमारी यादव (विकेटकिपर), रोमा थापा, रचना चौधरी, साना प्रवीन, ईश्वरी बिष्ट।
