आगामी आइतबार युएईको दुबईमा भारतले २१ महिनाको अवधिमा आफ्नो चौथो आइसिसी फाइनल खेल्दैछ।
मंगलबार आइसिसी च्याम्पियन्स ट्रफीको सेमिफाइनलमा अस्ट्रेलियालाई ४ विकेटले पराजित गर्दै भारतले फाइनलमा स्थान पक्का गर्यो।
च्याम्पियन्स ट्रफी आइसिसीका शीर्ष आठ टोलीबीच हुने एकदिवसीय प्रतियोगिता हो।
यसअघि २०२४ जुनमा भारतले आइसिसी टी-२० विश्वकपको फाइनल खेलेको थियो। जससँगै भारतले लगातार आइसिसीका सबै फरम्याटको विश्वपकको फाइनलमा स्थान पक्का गर्दै इतिहास कोरेको थियो। टी-२० विश्वकपको फाइनलमा भारतले दक्षिण अफ्रिकालाई ७ रनले पराजित गर्दै उपाधि जितेको थियो।
सन् २०२३ को नोभेम्बरमा घरेलु मैदानमा एकदिवसीय विश्वकपको फाइनलमा स्थान बनाएको थियो। यद्यपी सो फाइनलम भारतले अस्ट्रेलियासँग ६ विकेटले पराजय भोगेको थियो।
भारतले त्यसअघि सन् २०२३ मै विश्व टेस्ट च्याम्पियनसिपको फाइनलमा स्थान बनाएको थियो। जुन २०२३ मा इंग्ल्यान्डमा भएको फाइनलमा अस्ट्रेलियासँग प्रतिस्पर्धा गरेको भारतले जित निकाल्न भने सकेको थिएन। भारतमाथि अस्ट्रेलियाले २०९ रनको जित निकालेको थियो।
यसरी भारतले सन् २०२३ को जुन यता आफ्नो चौथो आइसिसी फाइनल खेल्ने इतिहास बनाउँदैछ। आइतबार च्याम्पियन्स ट्रफको उपाधिका लागि भारतले न्यूजिल्यान्ड वा दक्षिण अफ्रिकामध्ये एक टोलीसँग भिड्नेछ।
