आइसिसी च्याम्पियन्स ट्रफीको सेमिफाइनलमा भारतसँग पराजित भएपछि अस्ट्रेलियाको कप्तानको भूमिकामा रहेका स्टिभन स्मिथले एकदिवसीय क्रिकेटबाट संन्यासको घोषणा गरेका छन्। उनी टेस्ट र टी-२० का लागि उपलब्ध रहनेछन्।
३५ वर्षीय स्मिथले भारतसँगको हारपछि तुरुन्तै आफ्ना साथीहरूलाई संन्यास लिने कुरा जानकारी गराएका थिए।
उनी प्याट कमिन्सको अनुपस्थितिमा च्याम्पियन्स ट्रफीमा कप्तानको भूमिकामा थिए। अब उनी २०२७ को विश्वकपको लागि अस्ट्रेलियाको टोलीको हिस्सा हुनेछैनन्।
२०२४ को टी-२० विश्वकप टोलीबाट बाहिरिए पछि उनी हाल अस्ट्रेलियाको टी-२० टोलीमा छैनन्। तर उनले २०२८ को ओलम्पिक खेलमा अस्ट्रेलियाको प्रतिनिधित्व गर्न चाहेका छन् र छनोटको लागि उपलब्ध हुने बताएका छन्।
स्मिथ अस्ट्रेलियाका लागि सर्वाधिक रन बनाउने खेलाडीको सूचीमा १२ औं स्थानमा छन्। उनले १२ एकदिवसीय शतक प्रहार गरेका छन्I
स्मिथ २०१५ र २०२३ मा दुई विश्वकप विजेताको अभिन्न हिस्सा थिए। २०१५ मा उनले लगातार पाँच खेलमा पचास भन्दा बढी स्कोर बनाएका थिए।
उनलाई २०१५ मा आइसीसी पुरुष एकदिवसीय टोली अफ द इयर तथा २०१४-१५ र २०२०-२१ मा अस्ट्रेलियाको एकदिवसीय खेलाडी अफ द इयर घोषणा गरिएको थियो।
स्मिथले २०१५ देखि २०२५ सम्म ६४ एकदिवसीय खेलमा अस्ट्रेलियाको नेतृत्व गरेका थिए।
