आइसिसी च्याम्पियन्स ट्रफी २०२५ को फाइनलमा पुग्न अस्ट्रेलियाले भारतलाई २६५ रनको लक्ष्य दिएको छ।
मंगलबार दुबईमा टस जितेर पहिले ब्याटिङ गरेको अस्ट्रेलिया ४९.३ ओभरमा २६४ रनमा अलआउट भयो।
अस्ट्रेलियाका लागि कप्तान स्टिभ स्मिथले ९६ बलमा ४ चौका र १ छक्काको मद्दतमा ७३ रन बनाए। एलेक्सा क्यारीले रनआउट हुनुअघि ५७ बलमा ८ चौका र १ छक्का प्रहार गर्दै ६१ रनको योगदान गरे।
ओपनर ट्राभिस हेडले ३९ रन बनाउँदा उनका ओपनिङ पार्टनर कूपर कनोली शून्यमा आउट भए। मार्नस लबुसेन ११ रन र ग्लेन म्याक्सवेल ७ रन मात्र जोड्न सके।
बलिङमा भारतका मोहमद शामीले ३ विकेट लिए। बरुण चक्रवर्ती र रवीन्द्र जडेजाले २-२ विकेट हात पार्दा हार्दिक पाण्ड्या र अक्षर पटेलले १-१ विकेट आफ्नो नाममा लेखाए।
ट्रफीको दोस्रो सेमिफाइनलमा भोलि न्यूजिल्यान्ड र दक्षिण अफ्रिका पाकिस्तानको लाहोरमा भिड्नेछन्।
