आइसिसी च्याम्पियन्स ट्रफीको समूह चरणको अन्तिम खेलमा भारतले न्युजिल्यान्डलाई ४४ रनले पराजित गरेसँगै सेमिफाइनल समीकरण पूरा भएको छ।
दुबईमा भएको समूह ‘ए’ को अन्तिम खेलमा भारतले जित निकालेसँगै समूह विजेता बन्यो भने न्युजिल्यान्ड उपविजेतामा सीमित बन्यो।
अब सेमिफाइनलमा भारत र अस्ट्रेलियाबीच दुबईमा आगामी मंगलबार पहिलो सेमिफाइनल हुने भएको छ। न्युजिल्यान्ड र दक्षिण अफ्रिकाबीचको दोस्रो सेमिफाइनल पाकिस्तानको लाहोरमा बुधबार हुनेछ। प्रतियोगिताको आगामी फाइनल आइतबार हुनेछ।
आज भएको अन्तिम खेलमा भारतले दिएको २५० रनको लक्ष्य पछ्याएको न्युजिल्यान्ड ४५.३ ओभरमा २०५ रनमै अलआउट भयो।
न्युजिल्यान्डका लागि केन विलियमसनले ८१ रन जोडे पनि अरु ब्याटर चल्न सकेनन्। बलिङमा भारतका बरुण चक्रवर्तीले ५ विकेट लिए। उनले १० ओभरमा ४२ रन दिए। कुलदिप यादवले २ विकेट हात पारे।
त्यसअघि दुबईमा टस जितेको न्युजिल्यान्डले फिल्डिङ रोजेपछि पहिले ब्याटिङ गरेको भारतले ९ विकेटको क्षतिमा २४९ रन जोड्यो।
भारतका लागि श्रेयस अय्यरले ७९ रन जोडे। उनले ९८ बलमा ४ चौका र २ छक्का प्रहार गरे।
त्यसअघि कप्तान तथा ओपनर रोहित शर्मा १५ रन तथा शुभमन गिल २ रनमा आउट भए। विराट कोहलीले ११ रन मात्र जोड्न सके।
अय्यरसँगै अक्षर पटेलले ४२ रन र हार्दिक पाण्ड्याले ४५ रन जोड्दा भारतका लागि महत्वपूर्ण रह्यो।
बलिङमा न्युजिल्यान्डका म्याट हेनरीले ५ विकेट लिए। उनले ८ ओभरमा ४२ रन दिए।
