आइसिसी च्याम्पियन्स ट्रफीको सेमिफाइनलमा पुग्ने चारै टोलीको टुंगो लागेको छ।
समूह ‘बी’ को अन्तिम खेलमा इंग्ल्यान्डमाथि दक्षिण अफ्रिकाले ७ विकेटको जित निकालेसँगै अन्तिम चारमा पुग्ने चारै टोलीको टुंगो लागेको हो।
समूहमा दक्षिण अफ्रिका समूह विजेता बन्दा अस्ट्रेलिया उपविजेता बनेर अन्तिम चारमा पुगे।
यो समूहबाट अफगानिस्तान र इंग्ल्यान्ड बाहिरिए।
यसअघि समूह ‘ ए’ बाट न्युजिल्यान्ड र भारत अन्तिम चारमा पुगेका थिए। आयोजक पाकिस्तान र बंगलादेश भने बाहिरिएका थिए। न्युजिल्याान्ड र भारतबीच हुने समूहको अन्तिम खेलपछि समूह विजेतासँगै सेमिफाइनलमा भिड्ने समिकरण पूरा हुनेछ।
शनिबार पाकिस्तानको कराँचीमा भएको खेलमा पहिले ब्याटिङ गरेको इंग्ल्यान्ड १७९ रनमै अलआउट भयो। उसका लागि जो रुटले सर्वाधिक ३७ रन जोड्दा बलिङमा दक्षिण अफ्रिकाका मार्को जानसेन र मुल्डरले ३-३ विकेट लिए।
जवाफी ब्याटिङ गरेको दक्षिण अफ्रिकाका लागि भान डे डुसेनले नटआउट ७२ रन र हेनरिच क्लासेनले ६४ रन बनाए।
