घरेलु टोली श्रीलंकाले अस्ट्रेलियाविरूद्धको दुई खेलको एकदिवसीय सिरिज २-० ले क्लिनस्विप गरेको छ।
शुक्रबार कोलम्बोमा भएको दोस्रो खेलमा अस्ट्रेलियालाई १७४ रनको फराकिलो अन्तरले पराजित गरेसँगै सिरिज श्रीलंकाले आफ्नो पक्षमा परेको हो। यसअघि पहिलो खेलमा श्रीलंका ४९ रनले विजयी भएको थियो।
एकदिवसीयअघिको दुई खेलको टेस्ट सिरिज भने अस्ट्रेलियाले २-० ले जितेको थियो।
शुक्रबारको दोस्रो एकदिवसीय खेलमा टस जितेर पहिले ब्याटिङ गरेको श्रीलंकाले ४ विकेटको क्षतिमा २८१ रन जोड्यो। उसका लागि कुशल मेन्डिसले १०१ रन जोड्दा निशन मधुश्काले ५१ रन र कप्तान चारिथ असलंकाले नटआउट ७८ रन बनाए।
२८२ रनको लक्ष्य पछ्याएको अस्ट्रेलिया २४.२ ओभरमा १०७ रनमै अलआउट भयो। अस्ट्रेलियाका लागि कप्तान स्टिभ स्मिथले सर्वाधिक२९ रन बनाए। उसका आठ ब्याटरले दोहोरो अंकमा रन बनाउन सकेनन्।
बलिङमा श्रीलंकाका दुनिथ वेलालगेले ४ विकेट लिए भने असिथा फर्नान्डो र विनन्दु हसरंगाले ३-३ विकेट लिन सफल भए।
आगामी बुधबारदेखि सुरु हुने च्याम्पियन्स ट्रफीमा अस्ट्रेलिया समूह ‘बी’ मा छ। समूहमा अफगानिस्तान, इंग्ल्यान्ड र दक्षिण अफ्रिका छन्। समूह ‘ए’ मा आयोजक पाकिस्तानसहित भारत, बंगलादेश र न्युजिल्यान्ड छन्। प्रतियोगितामा भारतबाहेकका खेल पाकिस्तानका तीन स्थानमा हुनेछन्। भारतका खेल युएईमा हुनेछन्।
