सन् २०१७ पछि पहिलो पटक हुन लागेको आइसिसी पुरूष च्याम्पियन्स ट्रफी क्रिकेट प्रतियोगिताको विजेताले २.२४ मिलियन अमेरिकी डलर (३३ करोड १९ लाख रुपैयाँ बढी) नगद पुरस्कार जित्ने भएको छ।
आठ टोलीबीच दुई सातासम्म हुने प्रतिस्पर्धापछि आगामी मार्च ९ को फाइनलमा ट्रफी उचालेपछि विजेताले यो पुरस्कार जित्नेछ।
प्रतियोगिताको उपविजेताले १.१२ मिलियन अमेरिकी डलर पाउनेछ भने सेमिफाइनलमा पराजित दुई टोली प्रत्येकले ५ लाख ६० हजार अमेरिकी डलर पाउनेछन्। यो पुरस्कार राशी २०१७ संस्करणको भन्दा ५३% ले बढी हो।
आइसीसी पुरुष च्याम्पियन्स ट्रफीमा प्रत्येक खेलको जिते पनि पुरस्कार प्राप्त हुनेछ। प्रत्येक समूह खेल जित्ने टोलीले ३४ हजार अमेरिकी डलर पुरस्कार पाउनेछ। पाँचौं वा छैटौं स्थानमा रहने टोलीले ३ लाख ५० हजार अमेरिकी डलर कमाउनेछन् भने सातौं र आठौं स्थानमा रहने टोलीले १ लाख ४० हजार अमेरिकी डलर घर लैजानेछन्।
यसका साथै, सबै आठ टोलीलाई २०२५ को आइसीसी पुरुष च्याम्पियन्स ट्रफीमा प्रतिस्पर्धा गर्नका लागि प्रत्येक टोलीलाई १ लाख २५ हजार तयारी खर्च दिइनेछ।
सन् १९९६ पछि पाकिस्तानमा आयोजना हुने पहिलो विश्वस्तरीय क्रिकेट प्रतियोगिता कराँची, लाहोर र रावलपिंडीमा दुई सातासम्म खेलिनेछ। भारतका खेल भने युएईमा हुँदैछ।
यो संस्करणमा आठ टोलीलाई चार-चार टोलीको दुई समूहमा विभाजन गरिएको छ। प्रत्येक समूहका शीर्ष दुई टोलीहरू सेमिफाइनलमा पुग्नेछन्। समूह ‘ए’ मा भारत, बंगलादेश, न्युजिल्यान्ड र आयोजक पाकिस्तान छन्। समूह 'बी' मा अफगानिस्तान, अस्ट्रेलिया, इंग्ल्यान्ड र दक्षिण अफ्रिकाले प्रतिस्पर्धा गर्नेछन्।
आइसिसी पुरुष च्याम्पियन्स ट्रफी विश्वका शीर्ष आठ एकदिवसीय टोलीहरूसँग प्रत्येक चार वर्षमा हुनेछ भने महिला च्याम्पियन्स ट्रफी २०२७ मा टी-२० ढाँचामा सुरु हुनेछ।
