आइसिसी च्याम्पियन्स ट्रफीअघि भारत उत्कृष्ट लयमा देखिएको छ। अर्को सातादेखि सुरु हुने प्रतियोगिताअघि भारतले इंग्ल्यान्डविरूद्धको एकदिवसीय सिरिज घरेलु मैदानमा ३-० ले क्लिनस्विप गरेको छ।
भारतले एकदिवसीय सिरिजअघि इंग्ल्यान्डविरूद्धको टेस्ट सिरिज ४-१ ले जितेको थियो।
भारतीय टोलीका उत्कृष्ट बलर जसप्रित बुमराहले घाइते भएर ट्रफी गुमाउने भए पनि भारतीय टोलीका अरू बलर तथा ब्याटर लयमा देखिएका छन्।
इंग्ल्यान्डविरूद्धको एकदिवसीय सिरिजमा भारतका शुभमन गिलले सुरूवाती दुई खेलमा अर्धशतक प्रहार गर्दा बुधबार भएको तेस्रो खेलमा शतक प्रहार गरे। उनले तीन खेलमा कुल २५९ प्रहार गर्न सफल भए। उनी प्लेयर अफ दि सिरिज भए।
यस्तै कप्तान रोहित शर्माले दोस्रो एकदिवसीयमा शतक प्रहार गरेका थिए। विराट कोहलीले तेस्रो खेलमा अर्धशतक प्रहार गर्दा मध्यक्रमका ब्याटर श्रेयस अय्यरले पहिलो खेलमा ५९ रन, दोस्रो खेलमा ४४ रन र तेस्रो खेलमा ७८ रन बनाउन सफल भए। मध्यक्रममा मौका पाएका केएल राहुल भने अपेक्षाकृत चल्न सकेका छैनन्।
बलिङमा रवीन्द्र जडेजा सुरुवाती दुई खेलमा ३-३ विकेट लिएका थिए। बुमराहको स्थानमा च्याम्पियन्स ट्रफी खेल्न लागेका हर्षित रानाले तीन खेलमा ६ विकेट लिए। अर्शदिप सिंह, वासिङटन सुन्दर र अक्षर पटेलले पनि नियमित विकेट लिन सफल भएका छन्।
च्याम्पियन्स ट्रफीमा भारत समूह ‘ए’ मा छ। भारतसँगै यो समूहमा बंगलादेश, न्युजिल्यान्ड र पाकिस्तान छन्। प्रतियोगिताको आयोजक पाकिस्तान भए पनि भारतले आफ्ना सबै खेल युएईमा खेल्दैछ। भारतबाहेकका अरु देशका खेल भने पाकिस्तानमा हुनेछन्।
भारतले पहिलो खेल बंगलादेशसँग फेब्रुअरी २० मा बंगलादेशसँग, २३ फेब्रुअरीमा पाकिस्तानसँग र मार्च २ मा न्युजिल्यान्डसँग प्रतिस्पर्धा गर्नेछ।
समूह 'बी' मा अफगानिस्तान, अस्ट्रेलिया, इंग्ल्यान्ड र दक्षिण अफ्रिका छन्।
