बंगलादेशकी अफस्पिनर शोहेली अख्तर अन्तर्राष्ट्रिय क्रिकेट काउन्सिल (आइसिसी) बाट प्रतिबन्धित हुने पहिलो महिला क्रिकेटर बनेकी छिन्।
दुई एकदिवसीय र १३ टी-२० खेलेकी अख्तरलाई फिक्सिङ गर्ने प्रयास गरेको, घुस दिएको र आइसिसीको एन्टी करप्सन कोड (एसीयू) का लागि चाहिने पूर्ण विवरण खुलासा नगरेर अनुसन्धानमा बाधा पुर्याएको आरोपमा दोषी ठहराइएको छ।
आइसिसीको नियम उल्लंघन गरेको स्वीकार गरेपछि उनलाई सबै खाले क्रिकेटबाट पाँच वर्षको प्रतिबन्ध लगाइएको छ।
दक्षिण अफ्रिकामा आयोजित २०२३ महिला टी-२० विश्वकपको क्रममा बंगलादेशकी एक क्रिकेटरलाई उनले गरेको प्रस्तावको अनुसन्धानपछि प्रतिबन्ध लगाइएको हो।
यद्यपी ३६ वर्षीया अख्तर सो विश्वकपमा बंगलादेशको टोलीमा थिइनन्, उनले अन्तिम पटक अक्टोबर २०२२ मा खेलेकी थिइन्।
उनले बंगलादेश र अष्ट्रेलियाबीचको विश्वकपको खेलको क्रममा हिट विकेट आउट गर्न एक खेलाडीलाई २० लाख बंगलादेशी टाका (लगभग १६,४०० अमेरिकी डलर) को प्रस्ताव गरेकी थिइन्।
अख्तरले सम्पर्क गरेको खेलाडीले तुरुन्तै आइसिसीको एन्टी करप्सन युनिटलाई यो कुरा रिपोर्ट गरेकी थिइन्।
युनिटले अन्तर्वार्ता लिँदा शोहेलीले खेलाडीलाई भ्वाइस सन्देशहरू पठाएको पुष्टि गरेकी थिइन्। यद्यपी उनले खेलाडीको नियत जाँचका लागि मात्र सन्देश पठाएको भन्दै आरोपबाट पन्छिने प्रयास गरेकी थिइन्।
