इङ्लिस प्रिमियर लिग अन्तर्गत गएराति सम्पन्न खेलमा चेल्सी पराजित भएको छ। मार्को अर्नाटोभिकको उत्कृष्ट प्रदर्शनसहितको एक गोलले वेस्ट ह्याम युनाइटेडसँग चेल्सी पराजित भएकाे हो।
लण्डन स्टेडियममा भएको खेलमा वेस्ट ह्याम युनाइटेडका लागि अर्नाटोभिकले पहिलाे हाफकाे छैटौँ मिनेटमा एक गोल गरेका थिए। प्रतिस्पर्धात्मक बनेको खेलमा चेल्सीले गोल गर्ने धेरै अवसरहरू खेरा फाल्यो। दोस्रो हाफमा चेल्सीका हाजार्डको सशक्त प्रहार वेस्ट ह्यामका गोलरक्षले बचाए। दुईतिहाई बल पोसेसन कायम गरेपनि चेल्सीले गोल गर्न सकेन।
यससँगै चेल्सी ३२ अंकका साथ लिगको तेस्रो स्थान छ भने वेस्ट ह्याम १३ अंकका साथ अठारौँ स्थानमा छ। प्रिमियर लिगमा ४३ अंकका साथ म्यानचेस्टर सिटी शीर्ष स्थानमा यथावत् छ भने ३५ अंकका साथ युनाइटेड दोस्रो स्थानमा छ।
लिगको अर्को खेलमा टोटेनह्यामले स्टोक सिटीलाई ५–१ गोलअन्तरले हराउँदै फराकिलो जित निकालेको छ।
टोटेनह्यामका लागि ह्यारी केनले २ तथा इरिक्सन, साउक्रस र सन हेउङ मिङले १÷१ गोल गरे। याे जितपछि टोटेनह्याम २८ अंकका साथ पाँचौँ स्थानमा उक्लिएको छ।
