आफ्ना सहोदर दाजु तथा लुम्बिनी प्रदेशका पूर्वमुख्यमन्त्री डिल्लीबहादुर चौधरीलाई पैसा लगेकोबारे पोल लगाइदिएपछि बदला लिन महावीर चौधरीले निरज चौधरीको हत्या गरेको प्रहरीको प्रारम्भिक अनुसन्धानबाट खुलेको छ।
दाङ तुलसीपुर उपमहानगरपालिका–६ का २८ वर्षीय निरज चौधरीको नाता पर्ने र सोही वडाकै तुलसीपुर – ६ का ५१ वर्षीय महावीरले मंसिर २० गते बिहान आफ्नै रेष्टुरेन्टभित्रै गोली हानेर हत्या गरेका थिए।
निरजको हत्यापछि फरार महावीरलाई प्रहरीले बिहीबार बिहान ३ बजेतिर कैलालीको कैलारी गाउँपालिका – २ स्थित एक खाली घरमा लुकीछिपी बसेको अवस्थामा फेला पारी नियन्त्रणमा लिएको थियो।
बिहीबार नै प्रहरीले महावीरलाई बर्दिया पुर्याएर घटनाको प्रारम्भिक अनुसन्धान सुरू गरेको छ।
बर्दियाका प्रहरी प्रमुख एसपी सरोज पौडेलका अनुसार महावीर आफूसँग पैसा लगेको भनेर निरज डिल्लीबहादुरलाई भनेका थिए। निरजले पूर्वमुख्यमन्त्री समेत रहेका डिल्लीबहादुरकै जग्गामा उनीहरूले नै सञ्चालन गर्दै आएको पोल्ट्री फर्म रेखदेख गर्थे।
‘आफ्नै कुखुरा फर्ममा काम गर्ने गाउँ घरकै र नाता समेत पर्ने व्यक्तिबाट पैसा लगेर किन नदिएको हो? तैंले मेरो नातागोता आफन्त कसैसँग मेरो इज्जत राखिनस् मेरो बेइज्जत गरिस् भनेर माननीयज्यूले भाइलाई हकारेको हुँदा महावीर निरजसँग रिसाएको प्रारम्भिक अनुसन्धानबाट खुल्यो,’ एसपी पौडेलले भने, ‘आफूले निरजसँग पैसा लगेकोबारे दाजुलाई कुरा लगाइदियो अनि गाली खानु पर्यो भनेर सोही कारण तर्साउन वा बदला लिन पेस्तोल ताके पनि निरजसँग भनाभनकै क्रममा गोली हानेको भन्ने खुल्छ।’
एसपी पौडेलका अनुसार महावीरले धेरैसँग आर्थिक कारोबार गरेको र आफ्नो व्यवहार बिगारेको खुल्न आएको बताए।
‘धेरै आफन्त र चिनजानका मानिसहरूसँग तल्लो बाटो अमेरिका पठाइदिने आश्वासन दिँदै पैसा असुलेको खुलेको छ,’ एसपी पौडेलले भने, ‘केही विलासी र शौखिन स्वभावका रहेछन् महावीर।’
महावीर अमेरिकाका ग्रीन कार्ड होल्डर हुन्। उनका श्रीमती र सन्तान सबै अमेरिकामै छन्। उनी भने नेपाल आउजाउ गरिरहन्थे। त्यही भएर उनले विगतमा तल्लो बाटो सजिलै अमेरिका छिराइदिने आश्वासन दिएर धेरै मानिसहरूसँग रकम असुलेको खुल्न आएको प्रहरी बताउँछ।
नेपाल आउँदा महावीर दाजुको पोल्ट्री फर्म नजिकैको आफ्नो लगानी रहेको ‘हमार थारु घर एण्ड रेष्टुरेन्ट’ आउँदा पनि फार्म हाउसमा निरजसँगै बस्ने गर्थे।
प्रहरी निरीक्षक कार्कीका अनुसार महावीरलाई जिल्ला अदालत बर्दियाले सात दिन म्याद दिएर घटना अनुसन्धान गर्न पहिलो पटक बिहीबार म्याद दिएको छ।
शुक्रबार प्रहरीले पत्रकार सम्मेलन गरी महावीरलाई सार्वजनिक गर्दैछ।
सम्बन्धित समाचार:
युवकको हत्या आरोपमा पक्राउ परेका व्यक्ति लुम्बिनीका पूर्वमुख्यमन्त्री डिल्लीबहादुर चौधरीका भाइ
निरजको हत्या आरोपीको खुल्यो पहिचान
विदेश नपठाएपछि पैसा फिर्ता माग्दा साथीले नै गरे गोली हानेर हत्या
-1763886130.jpeg)
-1746009348.jpg)
