भूकम्पले भत्किएको ऐतिहासिक काष्ठमण्डपको पहिलो तला आगामी असार मसान्तसम्ममा पुनर्निर्माण गरिने भएको छ।
काष्ठमण्डप पुनर्निर्माण निर्देशक समितिको शुक्रबार बसेको बैठकले काष्ठमण्डपका लागि हालसम्म भएका कामको समीक्षा गरी चालू आर्थिक वर्षको अन्तसम्म पहिलो तला पुनर्निर्माण सक्नेगरी कार्ययोजना बनाइ कार्यान्वयन गर्ने निर्णय गरेको हो।
समितिका संयोजक एवं प्रदेश नं ३ प्रदेशसभा सदस्य राजेश शाक्यको अध्यक्षतामा बसेको बैठकमा राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले काष्ठमण्डपको काम योजनाबद्ध ढङ्गले अघि बढाउन निर्देशन दिए।
पुनर्निर्माणमा गुणस्तर कायम गर्नका लागि समय समयमा निर्माण सामग्रीलाई प्रयोगशालामा परीक्षण गराउन पनि उनले सुझाव दिए। समिति संयोजक शाक्यले पुनर्निर्माणलाई अघि बढाउन हनुमानढोका प्रहरी कार्यालय रहेको स्थानमा काठको एउटा वर्कशप सञ्चालन भएको र इन्द्रजात्रालगत्तै अर्को वर्कशप पनि स्थापना गरी काम गरिने जानकारी दिए।
‘पुनर्निर्माणमा प्रयोग गरिने सामग्री परीक्षण गरिएको र आगामी दिनमा पनि संयुक्त राष्ट्रसङ्घीय शैक्षिक, वैज्ञानिक तथा सांस्कृति सङ्गठन (युनेस्को) र पुरातत्व विभागले तोकेको मापदण्डअनुरुप परीक्षण गरिनेछ’,–उनले भने।
बैठकमा काठमाडौं महानगरपालिकाका प्रमुख विद्यासुन्दर शाक्य, उपप्रमुख हरिप्रभा खड्गी श्रेष्ठ, पुरातत्व विभागका महानिर्देशक भेषनारायण दाहाललगायत सरोकार भएका निकायका अधिकारी पनि सहभागी थिए। काष्ठमण्डप पुनर्निर्माणका लागि आवश्यक बजेट महानगरपालिकाले उपलब्ध गराउने र विभागले भने प्राविधिक सहयोग गर्ने जनाइएको छ।
