काष्ठमण्डप पुनर्निर्माण निर्देशक समितिको बैठकले हालसम्म भएका कार्यप्रगतिको समीक्षा गरेको छ। बैठकले २०७६ असार मसान्तभित्र काष्ठमण्डपको पहिलो तला पुनर्निर्माण गरिसक्ने तयारी गरेको छ। यसनिम्ति आवश्यक कार्ययोजना बनाई कार्यान्वयन प्रक्रिया अघि बढाउने निर्णय पनि गरेको छ।
शुक्रबार समितिका संयोजक एवं ३ नम्बर प्रदेशसभा सदस्य राजेश शाक्यको अध्यक्षतामा बैठक बसेको हो। बैठकमा राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले काष्ठमण्डपको काम योजनाबद्ध ढंगले यथाशीघ्र अघि बढाउन निर्देशन दिए।
उनले पुनर्निर्माण गुणस्तर कायम गर्न समयसमयमा निर्माण सामग्रीको प्रयोगशाला परीक्षण गराउन पनि सुझाव दिए।
समितिका संयोजक शाक्यले पुनर्निर्माण अघि बढाउन पुरानो डीएसपी कार्यालय रहेको स्थानमा काठको वर्कसप संचालन भएको र इन्द्रजात्रालगत्तै अर्को ठूलो वर्कसप स्थापना गरी संचालन गरिने जानकारी दिए।
काष्ठमण्डप पुनर्निर्माणमा प्रयोग गरिने सामग्रीको परीक्षण गरिएको र आगामी दिनमा पनि युनेस्को र पुरातत्व विभागको मापदण्ड अनुरुप परीक्षण गरिने पनि उनले बताए।
समीक्षा बैठकमा काठमाडौं महानगरपालिकाका मेयर विद्यासुन्दर शाक्य, उपमेयर हरिप्रभा खड्गी, पुरातत्व विभागका महानिर्देशक भेषनारायण दाहाललगायतको पनि उपस्थिति थियो।
काष्ठमण्डप पुनर्निर्माणमा आवश्यक सबै रकम काठमाडौं महानगरपालिकाले उपलब्ध गराउनेछ भने पुरातत्व विभागले आवश्यक प्राविधिक सहयोग उपलब्ध गराउनेछ।
