बहराइनमा रहेको अमेरिकी नौसैनिक अड्डामा इरानले मिसाइल हानेको छ।
बहराइनस्थित अमेरिकी नौसेनाको कमान्ड पोस्ट 'फिफ्थ फ्लिट'लाई इरानले निशाना बनाएको भनेर विभिन्न अन्तर्राष्ट्रिय सञ्चारमाध्यमहरूले समाचार लेखेका छन्।
इरानले आफ्नो देशमा अमेरिकी हमला भए मध्यपूर्वका विभिन्न देशमा रहेका अमेरिकी सैन्य अड्डालाई निशाना बनाउने चेतावनी दिएको थियो।
शनिबार बिहान इसराइल र अमेरिकाले इरानमा हमला गरेपछि जबाफमा इरानले बहराइनको हवाई अड्डामा आक्रमण गरेको भनेर बिबिसीले लेखेको छ।
बहराइनको सरकारी समाचार संस्था बिएनएले पनि फिफ्थ फ्लिटमा मिसाइल हमला भएको तर त्यो कहाँबाट आएको भन्ने चाहिँ उल्लेख गरेको छैन।
अमेरिकी टेलिभिजन नेटवर्क सिएनएनले दुई अमेरिकी अधिकारीहरूलाई उद्धृत गर्दै उक्त मिसाइल इरानबाटै हानिएको भनेर पुष्टि गरेको छ।
त्यसको क्षतिबारे भने केही खुलेको छैन।
इरानले यसराइलमा पनि जबाफी हमला गरेको छ। इरानमा हमलापछि इसराइलले आफ्नो हवाई क्षेत्र बन्द गरेको छ।
त्यस्तै दोस्रो चरणको आक्रमणका लागि पनि तयारी अवस्थामा रहेको भन्दै इसराइली अधिकारीहरूलाई उद्धृत गरेर सिएनएनले लेखेको छ।
इसराइलले इरानविरूद्धको आक्रमणलाई अपरेसन 'रोओरिङ लायन' नाम दिएको छ।
