अमेरिकी राष्ट्रपति डोनाल्ड ट्रम्पले इरानमा हमला जारी रहेको बताएका छन्।
शनिबार मध्याह्न इरानमा आक्रमण भएको भन्ने समाचार सार्वजनिक भएको केही समयपछि भिडिओ सन्देश जारी गर्दै ट्रम्पले इरानमा अमेरिकाले आक्रमण गरिएको पुष्टि गरेका हुन्।
उनले इरानविरूद्ध शक्तिशाली आक्रमण सुरू गरिएको भनेका छन्। इरानमा हमला गर्नुको कारणमा ट्रम्पले तेहरानको 'कट्टर र दुष्ट' शासकले अमेरिकाको राष्ट्रिय सुरक्षामा खतरा पुर्याउन खोजेपछि त्यसलाई रोक्ने प्रयास भनेका छन्।
उनले इरानका मिसाइलहरू नष्ट गर्ने तथा मिसाइल कारखाना र परमाणु भट्टीहरूलाई जमिनमा मिलाउने चेतावनी दिएका छन्।
गत जुन महिनामा अमेरिकाले इरानका आणविक संरचनामाथि बमबारी गरेपछि पनि तेहरानले आफ्नो आणविक कार्यक्रम पुनःनिर्माण गर्ने प्रयास जारी राखेको दाबी पनि ट्रम्पले गरेका छन्।
'उनीहरूले आफ्नो आणविक महत्वाकांक्षालाई अघि बढाउन सबै अवसर अस्वीकार गरे। अब हामीले धेरै सहन सक्दैनौं,' ट्रम्पले भनेका छन्।
अन्तर्राष्ट्रिय समाचार संस्था एपीका अनुसार आक्रमण इरानका सर्वोच्च नेता आयातोल्लाह अली खामेनीको कार्यालय नजिकै भएको छ।
राजधानी तेहरानसहित देशका विभिन्न स्थानमा विस्फोटका आवाज सुनिएको र धुवाँ उडेको दृश्य देखिएको इरानी सञ्चारमाध्यमहरूले जनाएका छन्।
ट्रम्पले इरानी जनतालाई आफ्नो सरकार आफ्नै हातमा लिन पनि आह्वान गरेका छन्।
अमेरिका र इसराइलले इरानलाई आणविक कार्यक्रम सीमित गर्ने सम्झौतामा ल्याउन दबाब बढाइरहेका बेला यो आक्रमण भएको हो।
इजरायली रक्षा मन्त्री इसराइल कात्जले इरानबाट भावी खतरा निस्तेज पार्नका लागि हमला गरिएको बताएका छन्। इरानमा हमलापछि इसराइलले देशभरि आपतकाल घोषणा गरेको छ। मानिसहरूलाई पनि घरभित्रै बस्न भनिएको छ।
इरानले अमेरिका संलग्न आक्रमण भए त्यसको बदलामा मध्यपूर्वका अमेरिकी सैन्य अड्डाहरूलाई लक्ष्य गरेर आक्रमण गर्ने धम्की दिँदै आएको छ।
तेहरानमा सर्वोच्च नेताको आवास क्षेत्र जाने सडकहरू बन्द गरिएको छ भने इरान र इजरायल दुवैले आफ्नो हवाई क्षेत्र अस्थायी रूपमा बन्द गरेका छन्।
आक्रमणबाट भएको क्षतिको विवरण र हताहतको संख्या सार्वजनिक भइसकेको छैन।
इसराइलले विशेष गरी इरानको सैन्य इलाकाहरूलाई लक्ष्य गरेर हमला गरेको भनेको छ।
इसराइलले इरानबाट सम्भावित हमलाको मध्यनजर गर्दै हवाई सुरक्षा व्यवस्था कडा बनाएको छ।
इसराइलमा ठुल्ठूला अस्पतालहरू पनि तत्काल भूमिगत रूपमा सञ्चालन हुने व्यवस्था गरिएको भनेर अमेरिकी टेलिभिजन नेटवर्क सिएनएनले जनाएको छ।
