नेपाली कांग्रेसको १५ औं महाधिवेशन फागुन २१ को चुनावअघि गर्ने कि पछि भन्नेमा केन्द्रीय समितिमा झण्डै एक महिनादेखि मतभेद भइरहेका बेला सभापति शेरबहादुर देउवानिकट २५ जना केन्द्रीय सदस्यहरूले भेला गरेर चुनावअघि महाधिवेशन नै 'बटमलाइन' भएको निष्कर्ष निकालेका छन्।
२०७८ साल मंसिर २४ देखि २८ गतेसम्म चलेको १४ औं महाधिवेशनमा देउवा समूहबाट उम्मेदवारी दिई निर्वाचित तथा केही सभापति देउवाबाट मनोनीत केन्द्रीय सदस्यहरूले महाधिवेशन गरेर मात्रै फागुन २१ को निर्वाचनमा भाग लिनुपर्ने निष्कर्ष निकालेका हुन्।
उनीहरूले महाधिवेशन गरेर मात्रै चुनाव गर्नुपर्छ भन्ने निष्कर्ष लिखित रूपमा अब बस्ने केन्द्रीय समितिमा पेस गर्ने तयारी पनि गरेका छन्। अब कात्तिक २५ गते बिहान साढे ११ बजे केन्द्रीय समिति बैठक बस्दैछ।
‘सोल्टीमोडको एक पार्टी प्यालेसमा आज हामी छलफलमा जुटेका थियौं, १४ औं महाधिवेशनमा देउवा प्यानलबाट उम्मेदवार भई चुनाव जितेका केन्द्रीय सदस्यहरूबीच १५ औं महाधिवेशन कार्यतालिकाकेन्द्रित कुराकानी भएको हो,’ छलफलमा सहभागी एक केन्द्रीय सदस्यले सेतोपाटीसँग भने, ‘पुस तेस्रो साताभित्रै नियमित महाधिवेशन गर्नुपर्छ भन्ने हाम्रो निष्कर्ष छ। अब बस्ने केन्द्रीय समितिमा यो कुरा लिखित रूपमै राख्छौं।’
छलफलमा पदाधिकारीहरूलाई बोलाइएको थिएन।
‘छलफलमा हामी २५ जना केन्द्रीय सदस्यमात्रै थियो। पार्टी सुदृढीकरण गर्न चुनावअघि महाधिवेशन गर्नुपर्छ भन्ने सबैजसोको राय आयो। जेनजीले भदौ २३ र २४ को आन्दोलनमा उठका विषय, पार्टीको चार वर्षे कार्यकाल मूल्यांकनलगायत कुराकानी भयो,’ ती केन्द्रीय सदस्यले भने।
छलफलको संयोजक राजेन्द्रकुमार केसीले गरेका हुन्।
छलफलमा पुष्पा भुसाल, देवेन्द्रराज कँडेल, अमृत अर्याल, अब्दुल सत्तार, आङ्गेलु शेर्पा, प्रदीप सुनुवार, डिला संग्रौला, धना खतिवडा, नानु बास्तोलालगायत रहेको ती केन्द्रीय सदस्यले बताए।
‘आज बिहान ८ बजेदेखि दिउँसो १ बजेसम्म केन्द्रीय सदस्यहरूबीच छलफल भएको हो,’ ती केन्द्रीय सदस्यले भने।
छलफलका निष्कर्ष लिखित प्रस्तावका रूपमा अबको केन्द्रीय समितिमा पेस गर्ने उनीहरूको तयारी छ। ‘ढिलोमा पुस तेस्रो साताभित्र १५ औं महाधिवेशन गर्नुपर्छ भन्नेमा हामी छौं,’ उनले भने।
सभापति शेरबहादुर देउवाले असोज २८ गते सानेपास्थित केन्द्रीय कार्यालय पुगेर उपसभापति पूर्णबहादुर खड्कालाई कार्यवाहक सभापतिको जिम्मेवारी दिएका थिए। सभापति देउवा भने उपचारका लागि सिंगापुर गएका छन्।
त्यसयता कार्यवाहक सभापति खड्काको अध्यक्षामा बस्दै स्थगित हुँदै केन्द्रीय समिति बैठक सञ्चालन हुँदै आएको छ।
केन्द्रीय समितिमा महामन्त्री गगन थापाले १० एजेन्डा पेस गरे पनि चुनावअघि महाधिवेशन कि चुनावपछि, नियमित कि विशेष भन्नेमा मात्रै केन्द्रीय सदस्यहरू विभाजित छन्।
महामन्त्री थापाले कात्तिक १८ गते केन्द्रीय समितिमा पुस १६ देखि १९ गतेसम्म महाधिवेशन गर्ने प्रस्ताव पेस गरेका थिए। सोही दिन सहमहामन्त्री महेन्द्र यादवले पनि समय लिएर बोल्ने क्रममा वैशाख अन्तिम साता नियमित महाधिवेशन उपयुक्त हुने बताएका थिए।
१५ औं महाधिवेशन कार्यतालिकाबारेमा कांग्रेस एकमत हुन सकेको छैन।
५४ प्रतिशत महाधिवेशन प्रतिनिधिहरूले असोज २९ मै कार्यवाहक सभापतिलाई भेटेर विशेष महाधिवेशन माग गर्दै हस्ताक्षर पनि बुझाएका थिए।
पुस २९ गतेसम्म नियमित महाधिवेशन नगरे विशेष महाधिवेशन बोलाउनुपर्ने विधानको बाध्यकारी व्यवस्था छ। त्यसैले पार्टी पदाधिकारीहरू नियमित महाधिवेशनमा जोड दिइरहेका छन् तर सर्वसम्मत कार्यतालिका आउन सकेको छैन।
यो पनि:
देउवा निकटहरूमा अहिले तीन वटा धार देखियो: अजयबाबु शिवाकोटी (भिडिओ)
देउवा पक्षकै यी केन्द्रीय सदस्य चुनावअघि महाधिवेशनको पक्षमा, नेतृत्वमाथि दबाब
चुनावअघि महाधिवेशन भ्याइन्छ कि भ्याइन्न भन्ने बहस गर्दागर्दै कांग्रेसले गुजार्यो एक महिना
३० वर्षमुनिका युवालाई वडादेखि केन्द्रीय समितिसम्म सहभागी गराउन गगन थापाले राखे विधान संशोधन प्रस्ताव
-1746009348.jpg)
