राष्ट्रिय स्वतन्त्र पार्टी (रास्वपा) का प्रवक्ता मनिष झाले डा.बाबुराम भट्टराई, जनार्दन शर्मालगायतका नेताहरुसँग सँगै निर्वाचनमा जानेबारे छलफल अघि बढाएको बताएका छन्।
शुक्रबारदेखि सौराहामा सुरू हुने केन्द्रीय समितिको विस्तारित बैठकको लागि चितवनमा आएका प्रवक्ता झाले बिहीबार बिहान भएको बैठकमा विभिन्न प्रस्तावहरूमाथि छलफल भएको जानकारी दिए। तर छलफलबाट कुनै निष्कर्ष निस्किनसकेको उनको भनाइ छ।
‘सुशासनका लागि काम गर्ने विषयमा छलफल भएको छ। यसका लागि गठबन्धन बनाउने कि, सँगै निर्वाचनमा जाने कि, एक अर्कालाई सघाउने कि, एक अर्कालाई डिस्टर्व नगर्ने पो हो कि, सबै मोडालिटीमा छलफल भयो,’ झाले सेतोपाटीसँग भने, ‘सँगै जाऔं भन्ने सवालमा पनि नेतृत्वको परिषद बनाऔं भन्ने, मधेसवादी दलहरुले ६ जनाको अध्यक्ष मण्डल बनाए झैं बनाउने कि भन्ने प्रस्तावहरुमा पनि छलफल भएका छन्। एक जनालाई सबैले मान्न तयार छौं भन्ने पनि विषय हुनसक्छ। यसमा छलफलमात्रै भइराखेको छ।’
भट्टराई वा शर्माले पार्टीको नेतृत्व लिने इच्छा राखेको हो भन्ने प्रश्नमा प्रवक्ता झाले राजनीतिमा सबैले नेतृत्वको दाबी गर्नु स्वभाविक भएको बताए।
'तर राजनीतिकमा के भन्छ भने अरूलाई नेता मान्न तयार हुनुहुन्न भने तपाईं नेता बन्न तयार हुनुहुन्न। त्यसैले यो सबै दृष्टिकोणमा छलफल भइराखेको छ।’
उनले रास्वपाले छलफलमा लचकता राखेको पनि बताए।
‘तर भाँचिनेगरि लचकता राख्दैनौं हामी। जबसम्म लचक हुनसक्छौं हुने हो नि। भाँचिनेगरी हुन भएन। त्यसैलेगर्दा हामी लचक छौं र पुरानो, असन्तुष्टी, राजनीतिक संस्कारहरुलाई परिवर्तन गरेर नयाँ सुशासन, सार्वजनक सेवा र संविधान तहत राजनीतिक अभ्यास गर्नको लागि सबै नयाँ दलहरू, नयाँ परिवर्तित राजनीतिक संस्कारको प्रस्तावनासहित आएका दलहरु एकजुट हुनुपर्छ भन्ने प्रस्तावको हामी सम्मान गर्छौं,’ उनले भने।
झाले राजनीतिमा सबै सम्भावनाहरूलाई खुल्ला राख्दै रास्वपाले झ्याल, ढोकाहरु खुल्ला राखेको उनले बताए।
कहिले कसैको कोसँग सैद्धान्तिक रूपमा वा संख्यागत रूपमा कुरा मिलेर गठबन्धन बन्छ भन्ने कुरा थाहा नहुने भएकाले विभिन्न दृष्टिकोणले सम्भावनाबारे चर्चा भइराख्ने उनले बताए।
‘हिन्दीमा एउटा कहावत छ बात करने से बात बन्ती है। कुरै नगरेपछि त कुरा कसरी हुन्छ र। त्यसैले विभिन्न दृष्टिकोणमा छलफल भइराख्नु, त्यसमा पनि नेपालमा एक किसिमको सम्मानित पूर्व प्रधानमन्त्री, सम्मानित नेतृत्वले बसौं भनेर बोलाउँदै गर्दा एउटा राजनीतिको संस्कार पनि भयो। त्यस्तो पहललाई सम्मान गरेर जानुपर्छ। छलफल गर्नुपर्छ,’ उनले भने, ‘उहाँहरू रास्वपामै जोडिने सम्भावनाको अन्त्य भएको छैन। हामी छलफलमै छौं।’
झाले सौराहामा हुने दुई दिनको बैठकमा पनि यस विषयमा छलफल हुने बताए। यो बैठकमा केन्द्रीय सदस्यसहित ५ सय १२ जना प्रतिनिधिहरु सहभागी हुँदैछन्।
‘देशभरबाट आउने प्रतिनिधिको पनि नारी छाम्छौं। महाधिवेशनमा सम्भावित प्रतिनिधिको २५ प्रतिशतजति सहभागी हुने बैठक हो। त्यसैले महत्वपूर्ण छ। हामी प्रतिनिधिहरुको धारणा लिन्छौं। त्यसले पनि फ्रेस म्याण्डेड दिनसक्छ,’ उनले भने, ‘आगामी निर्वाचनको लागि सिद्धान्त, गठबन्धन र नेतृत्व कस्तो हुनुपर्छ भन्ने विषयमा छलफल हुन्छ।'
-1746009348.jpg)
