निर्वाचन आयोगले फागुन २१ गतेको निर्वाचनका लागि सरकारलाई मुख्य गरी दुई वटा कुरामा ध्यान दिन आग्रह गरेको छ।
आयोगका कार्यवाहक प्रमुख आयुक्त रामप्रसाद भण्डारीसहित आयुक्तहरूले अन्तरिम सरकारकी प्रधानमन्त्री सुशीला कार्की, गृहमन्त्री ओमप्रकाश अर्याल र अर्थमन्त्री रामेश्वर खनाललाई सिंहदरबारमा भेटेका थिए।
भेटमा आयोगका आयुक्तहरूले पहिला निर्वाचनको माहोल बनाउन र दोस्रो सुरक्षा व्यवस्था मिलाउन विशेष आग्रह गरेका हुन्।
'हामीले निर्वाचनको प्रमुख सरोकारावाला भनेका राजनीतिक दलहरू हुन्, दलको एउटा मात्र हिस्सा बाहिर रह्यो भने पनि निर्वाचन गराउन गाह्रो हुन्छ भनेर सरकारलाई भनेका छौं,' भेटमा सहभागी एक आयुक्तले सेतोपाटीसँग भने, 'त्यसैले निर्वाचनको माहोल बनाउनुहोस् भनेर भनेका छौं।'
आयुक्तहरूले निर्वाचनको अर्को पक्ष सुरक्षा भएकाले सरकारले त्यसमा ध्यान दिनुपर्ने भनेको छ। निर्वाचनको प्रसार प्रसारदेखि मतदान र मतगणनासम्मका लागि सुरक्षाको भरपर्दो योजना बनाउन आयोगले सरकारलाई आग्रह गरेको हो।
देशभरका प्रहरी चौकी जलेको र सुरक्षा अंगको मनोबल खस्किएको अवस्थामा निर्वाचनमा परिचालित हुने गरी सुरक्षा अंगको मनोबल बढाउन आयोगले आग्रह गरेको ती आयुक्तले जानकारी दिए।
भेटपछि आयोगका प्रवक्ता नारायणप्रसाद भट्टराईले जारी गरेको विज्ञप्तिमा पनि नेपाल सरकारका तर्फबाट भरपर्दो सुरक्षा प्रबन्ध मिलाइदिन अनुरोध गरेको उल्लेख छ।
आयोगले निर्वाचनका लागि आवश्यक कतिपय सामान मौज्दात रहेको उल्लेख गर्दै नेपालभित्र उत्पादन हुने सामान नै प्रयोग गरिने समेत बताएको थियो।
भेटमा अर्थमन्त्री रामेश्वर खनालले भने मितव्ययी ढंगबाट निर्वाचन सम्पन्न गर्न आग्रह गरेका थिए।
आयोगले केही दिनभित्रै निर्वाचनका लागि आवश्यक बजेटबारे गृहकार्य गरी सरकारसँग माग गर्ने तयारी गरिरहेको छ।
'हामी अनावश्यक खर्च गर्दैनौं,' ती आयुक्तले भने, 'अघिल्लो पटकको निर्वाचनमा पनि हामीले ३ अर्ब बचत गरेर सरकारलाई फिर्ता गरेका थियौं। यसपटक पनि मितव्ययी ढंगले निर्वाचन गर्छौं भनेर सरकारलाई आश्वस्त तुल्याएका छौं।'
छलफलमा प्रधानमन्त्री कार्कीले जसरी भए पनि फागुन २१ गते निर्वाचन सम्पन्न गर्ने गरी काम गर्न आयोगलाई आग्रह गरेकी थिइन्।
'जसरी पनि निर्वाचन गराउनुपर्छ। त्यसैअनुसार तयारी गर्नुहोस् भनेर प्रधानमन्त्रीले भन्नुभएको छ,' ती आयुक्तले भने, 'स्रोतसाधनको कुनै कमी हुँदैन, तयारीका सम्पूर्ण काम अघि बढाउनुहोस् भनेर उहाँले भन्नुभयो।'
निर्वाचन आयोगले जारी गरेको विज्ञप्तिमा प्रधानमन्त्री कार्कीले निर्वाचनको अनुकूल वातावरण तयार गर्न सरोकारवालाहरूसँग छलफल गरिने बताएको उल्लेख छ।
-1757760202.jpg)
-1746009348.jpg)
